Ice Trawl atuakkamik saqqummersitsivoq
Ice Trawl Greenland A/S ukioq manna ukiut 30-nngortorsiorluni nalliuttorsiorneranut atatillugu, suliffeqarfiup aalisarnermilu inuussutissarsiorneq pillugit atuakkamik saqqummersitsisoqarpoq.
Aalisarnerup iluani suliffeqarfik Ice Trawl Greenland A/S ukioq manna ukiut 30-nngortorsiorluni nalliuttorsiorpoq. Tamanna malunnartinniarlugu suliffeqarfiup oqaluttuarisaanera pillugu atuakkamik saqqummersitsinissaq siulersuisut aalajangerpaat.
- Kalaallit Nunaanni aalisarnerup oqaluttuassartaa pillugu allaaserineqarsimasut
annikeqaat. Pingaartumik raajat imaani tunisassiat pillugit nassuiaatit annikeqaat.
Taamaammat Ice Trawl Greenlandip nalliuttorsiorneranut inuussutissarsiutip
pingaarutillip matuma saqqummiunnissaa periarfissaalluarpoq, Ove Rosing Olsen
tusagassiorfinnut nalunaarummi oqaluttuarpoq.
Raajarniarneq qitiutillugu
Nalliuttorsiortoq pillugu atuagaq nunatsinni aalisarnerup oqaluttuassartaanik imaqarpoq. Qitiulluinnartumilli raajat imaani tunisassiat pillugit nassuiaateqarnerulluni.
Atuagaq imaani kilisaatit raajarniutit ingerlanneqarnerat pillugu paasissutissiivoq inuillu tamatuminnga inuussutissarsiutillit oqaluttuarineqartut, siulersuisuunerit ilisimatitsipput.
- Siulersuisut atuakkap raajarniarnerup tamatumalu ineriartornera pillugu
ilisimasat annerulersissagai neriuutigaat, taamaalilluni siunissami raajarniarnermi
atugassarititaasunut oqallinneq pitsaanerulerlunilu ilisimasaqarfiunerulissaaq,
Ove Rosing Olsen oqarpoq nangillunilu:
- Aammattaaq Ice Trawl Greenlandip oqaluttuassartaa pillugu atuagaq
siulersuisunut piginnittunullu toqqammaviulluassallunilu Ice Trawl Greenland
A/S-ip ineriartorteqqinnissaanut pitsaasumik alloriarnerussaaq.
Atuagaq Atuagkani pisiarineqarsinnaavoq.