Ice Cap Tours Nunatta Eqqartuussivianit pineqaatissinneqartoq

SIK-p Ilulissani Ice Cap Toursip sulisuminut filippineriusunut eqqunngitsumik pinnittarsimanera ukioq ataaseq sinnerlugu sulissutigisimavaa.

Ice Cap Tours, Arne Niemann Jensenimik pigineqartoq suliaq aallartinneqarmalli pinngitsuunerarsimavoq, najukkamilu eqqartuussiviup ulloq 24. august 2020 pineqaatissiissutaata suliareqqitassanngortinneqarnissaa aalajangersimallugu.

Najukkami eqqartuussiviup Ice Cap Tours ilaatigut sulinngiffeqarnersiutissanik tunniussisimanngitsutut kiisalu sulisut marluk piffissami aalajangersimasumi aningaasarsiassaannik ilanngaassisarsimasutut eqqartuussimavaa.

Qaangiuttoorluni sulisimanermut piumasaqaammi ilalerneqanngitsut

Suliareqqitassanngortitsisoqarneranit ukioq ataaseq sinnerlugu ingerlareersoq pineqaatissiissutaasimasoq Nunatta Eqqartuussivianit atuuttussanngortinneqarpoq, tassani suliffeqarfik sulisorisimasaminut ataatsimut 58.506 koruunik sulisorisimasamilu aappaanut 71.683 koruuninik akiliisussanngortinneqarpoq.

- Nunatta Eqqartuussivianit maanna aalajangiisoqarnera filippinerinut taakkununnga marlunnut pitsaasuuvoq, aamma sulisitsisumut pineqartumut atatillugu asuli suliakkiisoqarsimannginnera pitsaasuuvoq, allattoqarfimmi pisortaq Bjarne Petersen aalajangiineq pillugu oqarpoq.

Nunatta Eqqartuussiviata aamma suliap suliarineqarnerani SIK-p aningaasartuutigisimasai 71.000 koruunit Ica Cap Toursimut akilerneqartussanngortissimavai.

SIK aamma qaangiuttoorluni sulisimanermut akiliuteqaqqusinermi Nunatta Eqqartuussivianit ilalerneqanngilaq, Nunatta Eqqartuussiviaata najukkami eqqartuussivik assigalugu naammaginartumik uppernarsaatissaqartoqanngitsoq nalilermagu.

Inuiaqatigiinni sanngiinnerpaanut akisussaaffeqartoq

Bjarne Petersenip neriuutiginerarpaa, suliaq amerlanerusunut pingaarutilimmik kinguneqarumaartoq.

- Inuiaqatigiinni sanngiinnerpaat qanoq isumagineqarnerat apeqqutaatillugu inuiaqatigiit nalilerneqartussaapput, innuttaaqativullu kangianeersut ajoraluartumik inuiaqatigiinni sanngiinnerpaanut ilaapput. Innuttaasut taakku ullumikkumut sanilliullugu pitsaanerusumik pineqartarnissaat tamatta akisussaaffigaarput. Maanna pineqaatissiissutaasup malitsigisaanik pineqartut taakku pitsaanerusumik atugaqalernissaat neriunarpoq, SIK-p allattoqarfiani pisortaq Bjarne Petersen Sermitisaq.AG-mut oqarpoq.

Sulisut qaangiuttoornersiutissaaannik tunniussisimannginnermut atatillugu uppernarsaataasinnaasunik takutitsisoqarsinnaasimannginnera SIK-mit suli uggorineqarpoq.

- Oqaatigineqareersutut, sulisuusimasut nalunaaquttap akunnerpassuini aningaasarsiaqaatiginagu sulisarsimanerannut eqqartuussivik naammaginartumik uppernarsaatissarsisinnaasimanngilaq. SIK-mit sulisut taakku marluk aningaasarsitinneqaratik qaangiuttoortinneqartarsimanertik pillugu oqaaserisimasaat upperineqarput, eqqartuussiviulli naliliinera soorunami ataqqineqarluni. Pineqartulli aningaasarsissutiginagu qaangiuttoortinneqartarsimanerat soorunami uggornarpoq, allattoqarfimmi pisortaq oqarpoq.

Suliaq immikkuullarissuunngitsoq

Taassuma sulisunut tamanut kaammattuutigaa, assigusumik pisoqaqqinnginnissaa anguniarlugu, qaangiuttoorluni sulinerit tamaasa uppernarsaateqartinniartassagaat.

- Ajornartorsiutaasorli tassaavoq, sulisut ilaasa suliffimminnik annaasaqarnissaq annilaangaasutigalugu piumasaqarnissamut merserinnittarnerat imaluunniit taamatut qaangiuttoortitaanermut atatillugu pisinnaatitaaffimminnik ilisimasaqanngittarnerat.

Bjarne Petersenip erseqqissaassutigaa, suliaq pineqartoq immikkuullarissuunngilluinnartoq. SIK-mit ataatsimut isigalugu nalilerneqarpoq, nunanit allaneersunik sulisoqarnermut atatillugu sulisitsisorpassuit malitarisassanik atuuttunik ataqqinnittartut. Ajoraluartumilli aamma sulisitsisorpaaloqartoq malittarisassanik ataqqinninngitsunik.

- SIK ukiuni malussunni kingullerni pingaartumik sulisunit kangianeersunit saaffigineqartarsimaqaaq, taakku oqaluttuarisarpaat sulisitsisuminnit naammaginanngitsumik pineqartarsimallutik, allattoqarfimmi pisortaq oqaluttuarpoq.