ICC Pituffik pillugu: Inuit pisinnaatitaaffiisigut ajornartorsiuteqarpoq suli aaqqiivigineqanngitsunik

USA-p Thule Air Basep aqqa sisamanngornermi Pituffik Space Basemut allanngortippaa. Tamanna sakkutooqarfimmi kalaallit politikerit nuimasut arlallit aamma USA-p Kunngeqarfimmi allaartitaa najuuttoralugit persuarsiorpalaartumik aaqqissuussisoqarnerani pivoq.

Inuit Issittormiut siunnersuisoqatigiiffianni ICC-mi atermik allanngortitsineq ilassilluarneqarpoq, nunallu tamalaat akornanni siulittaasup Sara Olsvigip ilaatigut innuttaasut 1953-imi sakkutooqarfik inissaqartinniarlugu pinngitsaaliissummik nutsertinneqartut ataqqiniarlugit nipaallisimaqatigiittoqarnera naammagisimaarpaa:

- ICC taamatut aaqqissuussisoqassasoq paasigatsigu, Amerikamiunut Naalakkersuisunullu kaammattuuteqarpugut, pinngitsaaliissummik nutsertitsinermut eqqaassutissaq takuniaqqullugu imaluunniit nipaallisimaqatigiittoqaqqullugu.

- Taamaaliorpugut oqaluttuarisaanermi pisimasup taassuma suli ullumikkumut kingunipiloqartup eqqaamanissaa pingaaruteqarmat, Sara Olsvig Sermitsiaq.AG-mut oqarpoq.

Annertuumik misissuisoqarnissaa neriuutigigaa

Sara Olsvig Pituffimmi sisamanngornermi aaqqissuussisoqarnerani najuuppoq. Tamannali pivoq ph.d.-iinngorniutimi suliarineqarneranut atatillugu ICC-mullu sinniisuutuunngitsoq.

ICC-mi neriuutigineqarpoq, sakkutooqarfiup aqqata allanngortinneqarnera 1953-imi pinngitsaaliissummik nutsertitsinerup kingunipiluinik qanimut misissuisoqarsinnaalernissaanut aallarniutaasinnaassasoq:

- ICC-mit kaammattuutigineqassaaq, sakkutooqarfiup sanaartorneqarnerata kiisalu nunasiaateqalersimanerup sumiiffimmut nalinginnaasumik qanoq kinguneqarsimanera itinerusumik misissuiffigineqartariaqartut, Sara Olsvig oqarpoq.

Siulittaasoq oqaluttuarpoq, ICC najukkami innuttaasunik apersuinermik suliaqarsimasoq, tamatumanilu paasineqarsimasoq, pinngitsaaliissummik nutsertitsinermut atatillugu suli aaqqiivigineqarsimanngitsunik ajornartorsiuteqartoq.

Nutsertitsisimaneq suli kingunipiloqartoq

- Pinngitsaaliissummik nutsertitsineq pimmat suli angalaannartutut inuusoqarpoq. Nutsertitsineq pimmat inuit tamaaniissimanngitsut ilaat tamatuma kingorna sulianut assersuutigalugu taarsiiviginninnermut atatillugu ilaasimanngillat, Olsvig erseqqissaavoq.

FN-imi nunat inoqqaavisa pisinnaatitaaffii pillugit immikkut nalunaarusiortartoq ukioq manna februaarimi nunatsinniimmat inuit pisinnaatitaaffiini ajornartorsiutit tamakkua ICC-mit immikkut nalunaarusiortartumut saqqummiunneqarput.

- Isumaqarpugut pinngitsaaliissummik nutsertitsineq inuit pisinnaatitaaffiini suli kingunipiloqartoq, qulaajaavigineqartariaqartunik. Nuutsinneqarsimaneq eqqarsaatigalugu aammali sumiiffimmik atuineq eqqarsaatigalugu taamalu aamma sumiiffinnik, isumalluutinik, piniartarfinnik atuineq ilisimasanillu tammatsaaliuineq aamma Inuit Nunaat, tassa imaappoq Kalaallit Nunaanni Canadamilu sumiiffik, akimorlugu killeqanngitsumik angalasinnaaneq eqqarsaatigalugit, Sara Olsvig oqarpoq.

Killeqanngitsumik angalasinnaaneq sulissutigigaat

ICC siusinnerusukkut Hingitaq 53-imik suleqateqarsimavoq pinngitsaaliissummik nutsertitsinerup sunniutigisimasai pillugit. Ilaatigut ICC aamma Hingitaq 53, 2001-imi, sakkutooqarfiup pilersinneqarneranit ukiut 50-inngorneranni, Pituffimmi eqqaassutissaliisimapput.

ICC Canadap Kalaallit Nunaatalu avannaata akornanni sumiiffik sikusanngitsoq, Pikialasorsuaq, pillugu suliniummut atatillugu sumiiffimmik aamma pingaartillugu sammisaqarpoq.