Inuit naapeqatigiinnerat
ICC-p ataatsimeersuarnera: One Arctic, One Future
ICC 1980-imi pilersinneqarmalli ataatsimeersuarnerit aalajangiisuunersaat
Ataasinngornermi juulip 21-anni ICC-p ataatsimeersuarnera Inuvimmi aallartissaaq. Kalaallit Nunaannit aallartitat 50-it missaanniittut sapaatip unnuaani tikipput, ullut aappaata affaa angalereersimallutik.
Inuit nunanit sisamaneersut 600-t ulluni tulliuttuni sisamani ataatsimeersuarnissaanni pingaarnerusutut sammineqassaaq issittup ineriartortinnera. The Arctic Journal malillugu taamatut oqarpoq EDuane Smith, ICC Canada-p præsidentia ataatsimeersuarnermullu qaqquusisuusoq.
– Piffissami nunarsuup allanngoriartorfiani inuuvugut - inununnuunnaanngisoq, aammattaarli Issittumut. Allanngornerit tamakku unammilligassaapput, aammattaarli periarfissanik pilersitsipput, oqaluuserisariaqarparpullu tamakkua qanoq atorrsinnaanerigut, Duane Smith oqarpoq.
Allanngornerit tamakku pissutigerpiarlugit canadap siulittaasoqarfiata ataatsimeersuarneq tamanna taavaa ´aalajangiisuunerpaaq´, ICC 1980-imi pilersinneqarmalli.
Ataatsimeersuarnerup qulequtaraa ´One Arctic, One Future´ (Issittoq ataasiusoq, siulissaq ataasiusoq), ataatsimeersuarnermilu sammineqassapput aningaasarsiornikkut ineriartorneq, avatangiisit, peqqissuseq atugarissaarnerlu, piniarneq nerisassanillu qulakkeerinninneq kiisalu pisortat ingerlatsinerat.
Canadap siulittaasoqarfiata aningaasarsiornerup ineriartornissaanik samminninnerata ilaatut Duane Smith naapertorlugu siunnersuuteqarniarput issittumi inuit siunnersuisoqatigiivinik pilersitsinissamik, taassuma pingaarnerusutut siunertarissallugu Issittumi nunami imaanilu uumasut amerlassusaannik nakkutilliineq.
– Uumasut tamakkua killeqarfiit akimorlugit ingerlaartarput, taamaattumillu killeqarfiit akimorlugit aaqqiissutissarsiortariaqarpoq, Arctic Journal malillugu Duane Smith naliliivoq.
Taassuma ukiumi tuliluttumi suliassat immikkut pingaarutilittut taavai, tassa Canadap ICC-mi aamma Issittumi Siunnersuisoqatigiinni siulittaasuuneq tigummimmagu.
– Tamanna qaqutiguinnaq pisarpoq, pingaaruteqarporlu tamassuma atuunnerata atorluarniarnissaa, taanna tikkuaavoq.
Okalik Eegeesia siulittaasunngussaaq
Ukiut sisamakkaarlugit ataatsimeersuartoqartarpoq, peqataasarpullu inuit Kalaallit Nunaanneersut, Canadameersut, Alaskameersut Ruslandimeersullu. Kingullermik 2010-mi Nuummi ataatsimeersuarnermi Aqqaluk Lynge nunani tamalaani ICC-mi siulittaasutut toqqarneqarpoq.
Naatsorsuutigineqarpoq sisamanngorpat Olalik Eegeesiak siulittaasunngussasoq, taannalu Qitiqtani Inuit Association-imi, Baffinimi territoriani inuit piumasaqaataannik ingerlatsisumi, siulittaasuuvoq.
Ukioq manna ataatsimeersuarnermi Kalaallit Nunaannit 50-it missaanniittut peqataapput, ilaatigut Naalakkersuisut siulittaasuat Aleqa Hammond kiisalu IA-p siulittaasua Sara Olsvig.
Aqqaluk Lyngep Sermitsiami sapaatip akunnerani saqqummersumi oqaluttuaraa ukiuni 34-ini nunap inoqqaavi sullisereerlugit ICC-p siulersuisuunerinit tunuaruni sulerissanerluni.