ICC naqissusiivoq: Umiarsuarnit immap naqqani nipiliortitsinerit annikillisarneqassapput

Kalaallit Nunaata eqqaani imaatigut umiarsuit angalasartut amerliartuinnarput.

Inuit Circumpolar Councilimi (ICC) nunani tamalaani siulittaasoq, Sara Olsvig, Londonimi taama aallarniuteqarpoq. Immap naqqani umiarsuit nipiliortitsinerat annikillisinneqartariaqartoq taanna isumaqarpoq, nipit inuit pisariaqartitaannut uumasunut ilungersunarluinnartunik kinguneqartitsisinnaanerat pissutigalugu.

Naalagaaffiit Peqatigiit Imarsiornermi suliniaqatigiiffia (IMO), nunani tamalaani imarsiornermi aalajangersaaffiusoq, sapaatip akunnerata siuliani umiarsuarnit immap naqqani nipiliortitsisarneru annikillisarneqarnissaa pillugu oqallitsitsivoq – tassanilu Sara Olsvig aamma ICC ersarissumik oqariartuuteqarput:

- Inuit Nunaata (Issittup imartaani, aaqq.) sineriaanni uumasunik akornusiinerup pisuussutit uumassusillit piniakkavut sunniuteqarfigissavai, taamaalilluni inuit inuussutaat, kulturiat aamma naggataatigullu nerisaqarnitsinnik attassinissatsinnut, ICC-mi siulittaasoq, Sara Olsvig oqarpoq.

Immami nillertumi nipi ungasinnerusumut ingerlaartartoq

ICC-p oqarnera naapertorlugu immap naqqani nipiliornerit pissusilersornernut akornusiisinnaavoq, ilaatigut uumasut miluumasut imarmiut uippakajaalersillugit, nuliarnerannik aamma angalariaasaannik akornusiilluni, tusagassiuutinut nalunaarummi tamanna oqaatigineqarpoq.

Lisa Koperqualuk, ICC-mi siulittaasup tullia isumaqataavoq. Umiarsuarnit nipinit akornusersuinerit nipit imaani nillertumi ungasinnerusumut angalasinnaanera pissutigalugu, Issittumi imartani malunnaatilimmik sunniuteqartartut Nunap inoqqaavisa ilisimasaannut aamma ilisimatusarnermut innersuussilluni, taanna ilisimatitsivoq.

Ukiuni arfinilinni tulliuttuni iliuuseqartoqanngippat nipiliortitsinerit marloriaatinngortussaasut, Issittumi Siunnersuisoqatigiit nalunaarusiami takutinneqarpoq, taamaattumillu nipiliornerit annikillisarniarlugit, ICC naapertorlugu sukkasuumik iliuuseqarnissamut ineriartortitsisoqarnissaat pingaaruteqarpoq.

ICC-p oqariartuuteqarnera naapertorlugu annikillisitsinissamut anguniakkat maanna kajumissutsimik iliuuserineqarput, kisianni Lisa Koperqualuk naapertorlugu piumasaqaataasariaqarput:

- Annertunerusumik atuutilersitsinissaq qulakkeerniarlugu, IMO pinngitsoorani piumasaqaataasunik suliaqartariaqaraluarpoq, soorlu umiarsuit immikkut nipiliortitsinernik annikillisitsinissamut aalajangersimasumik pilersaarusiortillugit.