ICC namminersorlutik oqartussanit tatigineqarnerusoq

Isumasiuinermi nutaami aperineqartut 60 procentiisa ICC assut imaluunniit naliginnaasumik tatigaat. Isumasiuineq suliarineqarsimavoq kalaallit akornanni kattuffinnut tatiginninneq qanoq annertutiginersoq paasiniarlugu. Aperineqartut 44 procentiisa namminersorlutik oqartussat tatigaat.

Isumasiuinermik suliarinittoq tassaavoq HS Analyse Canadamiut avatangiisit illersorniarlugit suliniaqatigiiffiat Oceans North ICC-mit suleqatigineqartoq sullillugu suliarinnittuusimasoq. Isumasiuinermi inuit 721-it peqataasimapput.

- Inuit pisinnaatitaaffii pillugit illersuisutut inuiaqatitsinnit tatigineqarnerput nuannaarutigaarput. Ullummi tamaasa ilungersorpugut. Ajuusaarutigaarpulli namminersorluni oqartussanneq taama appasitsigisumik nalilerneqarmat, naak ukiorpassuit ilungersuutigisimallutigu piviusunngortinnissaa, ICC-p siulittaasua Aqqaluk Lynge misissuineq pillugu oqaaseqarluni naliliivoq.

Uuliasiorneq ernumanartippaat
Isumasiuinermi peqataasut kattuffinnut assigiinngitsunut qulinut tatiginninnerat pillugu apersorneqarput. Aalisartut piniartullu kattuffiat KNAPK 52 procentinit tatigineqarpoq. Aperineqartut 50 procentiisa aalisarnermut, piniarnermut nunalerinermullu naalakkersuisoqarfik tatigaat.

Isumasiuinermi peqataasut aamma aperineqarput Nunatta imartaani uuliasiorluni qillerineq qanoq isumaqarfigineraat. 17 procentit taamaallaat isumannanngitsutut nalilerpaat 54-illi isumaqarput ulorianarpallaartoq imaluunniit ulorianaatilik. Avatangiisit pillugit suliniaqatigiiffik Greenpeace issittumi suliniuteqarpoq taaguuserlugu ’Save the arctic’ tassanilu imaani uuliasiorneq akerlilersorpaat. Aperineqartulli 25 procentiinnaasa Greenpeace tatigaat.

Isumasiorneqartut aamma aperineqartut nunanut assigiinngitsunut tatiginninnerat pillugu. 24 procentit Kina tatigaat 45 procentit Danmark tatigigaat. Nassuiarneqanngilarli sooq nunanut assigiinngitsunut tatiginninneq ilanngullugu apersuutigineqarsimasoq.