ICC-mi siulittaasuusimasoq kulturimik nittarsaassisutut ivertinneqarpoq

Qeqqata Kommuniani kulturimik nittarsaassisussatut innersuunneqarsimasuni quliusuni, 79-inik ukiulik Carl Christian Olsen, Puju, kulturimik nittarsaassisussatut ivertinneqarpoq. Taanna ICC-mi siulittaasuusimavoq, ilisimatuujulluni inuillu pisinnaatitaaffiinik anguniagaqarnermik suliaqartuulluni.

Ivertitsineq pivoq ullukinnermi 21. december 2022, Qeqqata Kommunia nittartakkamini allappoq.

Ilinniartitaanermut ataatsimiititaliami siulittaasup, Evelyn Mølgaardip, S, Carl Christian Olsenip toqqarneqarneranut tunngavilersuutitut taavai, kulturitoqaq pillugu suliaqarsimanera, oqaatsit pillugit ilisimasaqassusaa kiisalu inuit pisinnaatitaaffiisa atuutsinnissaanik suliniuteqarnera.

- Inuusuttunut sunniuteqarluarnissaa ilisimasallu nutaqqanillu pigiliunneqarnissaat pingaaruteqarpoq, Evelyn Mølgaard oqarpoq.

Kulturip pigiinnarnissaa ineriartortinnissaalu

Ataatsimiititaliap Carl Christian Olsenip toqqarneqarneranut ilaatigut tunngavilersuutigaat taanna nunatsinni kulturimik, oqaatsit pillugit kiisalu inuit pisinnaatitaaffii pillugit annertuumik suliaqarsimanera.

- Kulturimik nittarsaassisussatut ivertitsinermi ivertinneqartorlu isumaqatigiissusiortarpugut. Kulturimik nittarsaassisunngorneq imminermini pisussaaffiliivoq, suliarisanik nittarsaassinissamut. Carl Christian Olsenip kulturi, oqaatsit inuillu pisinnaatitaaffii pillugit suliaminik nittarsaassinissani pisussaaffigilerpaa, ilisimasanilu inuusuttunut ingerlateqqissallugit nammineq, Evelyn Mølgaard nassuiaavoq.

Qeqqata Kommuniani kulturimik nittarsaassisuuneq aningaasartaqanngitsoq, aamma nassuiaatigineqarpoq.

Ivertitsinermi ivertinneqartup pania, Nunni Navaranaaq Olsen, ataataminut oqalugiarnermini, oqaatsit naleqartinnerinut qujassuteqarpoq.

ICC-p siulittaasua, Sara Olsvig ivertitsinermi internetikkut attavilerluni aamma peqataavoq.

Carl Christian Olsen, Puju, Qeqqata Kommuniani kulturimik nittarsaassisussaaq 21. juni 2024 tikillugu.