ICC-mi siulittaasup inuit pisinnaatitaaffii "nutaat" nersualaarpai
Ullumi ulloq 9. august tassaavoq Nunarsuarmi Nunat Inoqqaavinut ullorititaq, ICC-milu siulittaasup Sara Olsvigip tassunga atatillugu FN-ip aalajangersagaata nutaap akuerineqarnera nuannaarutigaa.
Aalajangersakkami pineqarpoq, avatangiisit saligaatsut peqqissuusullu inuit pisinnaatitaaffiisut FN-imit ullo 28. juli akuerineqarnerat.
Sara Olsvigip oqaatigaa, avatangiisit saligaatsut, peqqussuusut piujuartinneqartullu inuttut pisinnaatitaaffittut akuersaarneqarnerat Nunarsuarmi inuit pisinnaatitaaffiinik isiginnittariaatsimik allannguinermik takutitsisoq.
- Ukiuni qulikkaani Inuit silap pissusiata allanngoriartorneranit nunattalu, imartatta, silaannattalu mingutsinneqarnerannit pisinnaatitaaffivut toqqaannartumik annertuumillu sunnerneqarnerat nunat naalakkersuisuinit isiginiarneqassasoq suaarutigisarsimavarput.
- Naalagaaffiit Peqatigiit Ataatsimeersuarnerisa avatangiisit saligaatsut peqqissuusullu inuttut pisinnaatitaaffittut akuersaarmassuk naalakkersuisunut inuussutissarsiortunullu Issittumi avatangiisinik illersuinissamik pisussaaffiliinermi alloriarneq pingaarutilerujussuuvoq, Sara Olsvig tusagassiorfitsigut nalunaaruteqarnermi oqarpoq.
- Issittumik illersuineq nunarsuarmik illersuinerusoq
Sara Olsvig ICC juulimi ataatsimeersuarmat Inuit Issittormiut Siunnersuisoqatigiiffianni siulittaasusut toqqarneqarpoq, taassumalu nalunaaruteqarnermi Issittup illersorneqarnissaata pingaaruteqarnera eqqaasissutigaa:
- Issittumik illersuineq tassaavoq nunarsuarmik illersuineq. Issittumi pinngortitap
ataqatigiinneranut, uumassuseqassutsip assigiinngisitaarneranut, avatangiisinut, immap sikullu qanoq issusaannut silallu pissusiata allanngoriartorneranut Inuit ilisimasanik
tunniussaqartarput. Issittumi avatangiisit illersorniarneranni Inuit naligiimmik
peqataatinneqarnissaat avaqqunneqarsinnaanngilaq, Olsvig oqarpoq.
Erseqqissaassutigaa, pinngortitap ataqatigiinneranik inuit pinngitsuisinnaanngitsut:
- Avatangiisitta illersorneqarnissaat peqqissusitsinnut isumannaatsumillu inuussutissaqarnissatsinnut, kulturikkullu, aningaasarsiornikkut inuuniarnikkullu piujuarnissatsinnut tunngaviulluinnarpoq. Issittumi avatangiisit isumannaatsuunissaat peqqissuunissaallu pillugu suliniuteqarnermi salliujuassaagut, naalakkersuisuniillu, ilisimatuunit inuussutissarsiortuniillu iliuusissanik ujartuinermi peqataatinneqartuarumavugut.