ICC Issittumi Siunnersuisoqatigiinni taaseqataasarusuttoq
Kalaallit Nunaanni ICC, Issittumi Siunnersuisoqatigiinni Kalaallit Nunaata qaffassinnerussumik inissimalernissaanut tapersersuivoq. Kattuffimmiilli isumaqartoqarpoq, nunat inoqqaavisa kattuffii siunnersuisoqatigiinni sunniuteqarnerullutillu taaseqataasinnaasariaqartut.
Sapaatip akunnerani kingullermi saqqummiunneqarpoq, Kalaallit Nunaat Issittumi Siunnersuisoqatigiit ataatsimiinneranni qaffasinnerusumik inissisimasalissasoq.
Kalaallit Nunaanni ICC-p taamatut nalunaaruteqartoqarnera pissusissamisoortutut ineriartornerunerarpaa:
- Tamanna Kunngeqarfimmi ineriartorneruvoq tapersersorluinnagara. Kunngeqarfiup
issittortaani najugaqartugut Issittumi Siunnersuisoqatigiinni nunatta siuttutut
inissisimalernera pissusissamisoorpoq.Tassami uaguuvugut Issittumi suleqaatigiinnermi
aalajangiinerni pineqartartut sunnerneqartartullu, Kalaallit Nunaanni ICC-mi Siulittaasoq
Hjalmar Dahl tusagassiorfinnut nalunaaruteqarnermi oqarpoq.
Kalaallit Nunaanni ICC-imit oqaatigineqarpoq, illersornissaq sillimaniarnerlu pillugit siunenrsuisoqatigiinni nunanut allanut tunngatillugit politikkikkut aalajangiisoqarneq ajortoq.
Taaseqataasaruttut
Siunnersuisoqatigiinni annertunerusumik avatangiisit, silap pissusai, peqqinnissaq, immakkut angallannermi suleqatigiinneq aammalu aningaasarsiornermi imminut nammassinaasumik ingerlatsisinnaanerup ineriartortinneqarnissaa sammineqartartuni pingaarnerpaapput.
Issittumi Siunnersuisoqatigiit
- Issittumi Siunnersuisoqatigiit issittumi pissutsit pillugit oqallittarfiupput, soorlu sammineqartarput Issittumi avatangiisinik illersuinissaq, silap pissusai, peqqinnissaq, immakkut angallannermi suleqatigiineq aamma aningaasarsiornermi imminut nammassinnaasumik ingerlatsisinnaanerup ineriartortinneqarnissaa.
- Issittumi Siunnersuisooqatigiinni Naalagaafiit arfineq pingasut ilaassortaasut tassaapput: Kunngeqarfik Danmark, Norge, Sverige, Finland, Island, Rusland, Canada USA-lu.
- Issittumi nunap inoqaavisa kattufii siunnersuisoqatigiinni ilaasortaasut tassaapput:
Aleut International Association, Arctic Athabaskan Council,
Gwich'in International Council, Inuit Circumpolar Council (ICC),
Russian Association of Indigenous Peoples of the North of Saame Rådet. - Aamma nunat kattuffiillu arlallit alapernaattutut peqataasarput, katillugit 40-t.
Pissarsiffik: Udenrigsministeriet/ICC Grønland
Kalaallit Nunaanni ICC isumaqarpoq, nunat inoqqaavisa kattuffii suliaqartarnermut sunniuteqarnerusariaqartut aamma Issittumi Siunnersuisoqatigiit ineriartortinneqartariaqartut:
- Oqaatigisariaqarpoq ataatsimiinnerni peqataagaluarluni apeqqutini oqaluuserineqartuni
uagitsinnullu sunniuteqartussani taaseqataasinnaannginneq pissusissamisoortutut
isigineqarsinnaanngimmat. Piviusorsiortumik siunissami pisussat eqqarsaatigalugit Issittumi nunat inoqqaavisa isumalimmik pisinnaatitaaffeqarlutik peqataasarnissaat pisariaqavippoq.
- Naatsumik oqaatigalugu Issittumi Siunnersuisoqatigiinni taaseqataasinnaasariaqarnerput
anguniartariaqarpoq, Hjalmar Dahl oqarpoq.
Issittumi Siunnersuisoqatigiit ataatsimiinneranni Kalaallit Nunaat Danmarkimit siulliulluni oqaaseqarsinnaatitaaleraluartoq, Naalakkersuisunit ilisimatitsissutigineqarpoq, Kalaallit Nunaat ataatsimiinnerni 'siuttuusinnaatitaassanersoq' suli erseqqissumik paasineqanngitsoq.