ICC inuusuttunut isumasiortitsivoq
ICC-p pilersitsisua, Esben Hobson, novemberip 7-ani inuuissiortarsimammat, Inuit Ulluanni, ICC Greenland malunnartitsilluni Nuummi inuusuttunut isumasiortitsivoq.
Kinaassutsip pingaartitallu qanoq pingaaruteqassusiat, peqataasut 50-t missaanniittut, ICC Greenlandip 7. november isumasiortitsimmat oqallisigaat. Ulloq taanna tassaavoq ICC-p pilersitsisorisimasaata, Esben Hobsonip, Alaskami Utqiagvimmeersup, inuuia, taanna toqoreeraluartoq ulloq taannaalersimavoq Inuit Ulluat.
Isumasioqatigiinneq ICC Greenlandip Kommuneqarfik Sermersuullu suleqatigiillutik aaqqissuuppaat.
ICC tusagassiorfinnut taama nalunaaruteqarpoq.
- Nuannaarpunga sammisaqartitsineq iluatsilluartoq, aasarmi malugisimavarput oqallitsinneqarnissaq pisariaqartinneqartoq. Inuusuttut peqataasut kinaassuseq pillugu isummaminnik assigiinngitsunik saqqummiussisoqarnera soqutiginarsimavoq, aammalu pingaartitat naleqartitallu suut siunissamut ingerlateqqikkumanersut ersarilluni, Kommuneqarfik Sermersuumi borgmester Charlotte Ludvigsen oqarpoq, inuusuttunullu oqarluni:
- Neriuppunga oqallinnerup ingerlateqqinneqarnissaanut pissarsiaqarluarsimassasut aammalu ilinniartoqarfinni aaqqissuisinnaassasut, eqqartortuarnissaa pisariaqarmat.
Oqallinneq pingaaruteqartoq
ICC Greenlandip siulittaasuata, Hjalmar Dahlip oqaluttuaraa pingaartitat kinaassutsillu oqaluuserinissaat suli pingaaruteqarneruleriartortoq.
- Isumaqarpunga inuusuttunik isumasioqatigiissitsinitta kinaassutsitsinnik inuiattullu naleqassutsitsinnik eqqartuiuartariaqarnerput uppernasigaa. Inuusuttut siunissartik qanoq ittuutikkusullugu oqariartuutaat tusaasariaqarput siunissatsinnik tikkuusisuussummaata, Hjalmar Dahl, ICC Greenlandimi siulittaasoq oqarpoq.