ICC COP27-mut: - Oqariartuutigut inassuteqaatigullu tusarneqarput

Sara Olsvig, nunanit tamalaani ICC-mi siulittaasoq, COP27 pillugu arlariinnik isumaqarpoq. Taarsiivigitissinnaanermullu aaqqissuussaq nutaaq naapertuilluarnermut alloriarnertut nalilerpaa.

COP27-p naammassinerani isumaqatigiissut nutaaq atuutilerpoq.

Naak Naalagaaffiit Peqatigiit silap pissusia pillugu ataatsimeersuartitsineranni, Sharm el-Sheikh Igitsinimi novembarip arfernaniit 18-iata tungaanut ingerlanneqartumi, isumaqatiginninniarnerit pikkunaraluartut. Ataatsimeersuarneq ullunik marlungajannik qaangiuttoorfiuvoq, aningaasaateqarfimmik nutaamik pilersitsinissamut isumaqatigiissusiorniartoqarmat. Aningaasaateqarfik sila pissutaalluni ajunaarnersuaqartillugu eqqugaasunut ikiorsiisartussamut isumaqatigiissusiorneq. Nunanut piitsoqarfiunerusunut periarfissaalerpoq ikiorneqarnissamik.

Aningaasaateqarfiup ilusilersugaanera ataatsimiititaliamit misissorneqassasoq aappaagu atuutilerniassammat Ritzau allaaserisaqarpoq.

- Silap pissutaalluni eqqugaasunut naapertuilluarnerunermik qulakkeerinninneruvoq. Naggueqatigiit inuit, ukiorpassuarni silap pissusiata allanngoriartorneranik eqqugaasartut, aningaasaateqarfimmiit ikiorneqartalersinnaanerat qulakkeerniarlugu sukataassaagut.

Nunani tamalaani ICC-mi siulittaasoq Sara Olsvig taama oqarpoq. Ikummatissat uummassusilinneersut atorunnaariartornissaannik ataatsimeersuarnermi peqataasut isumaqatigiissutiginngikkaat – tamannalu isumakulunnartoq – oqarpoq.

Siumut ataatsimik kingumulli marlunnik alloriarneq

COP26-mi 2021-mi isumaqatigiissutigineqartumi nunat inoqqaavi pisinnaatitaaffiillu peqataatinneqarpiannginneri nunani tamalaani siulittaasup isumakuluutigai. Silallu kissakkiartornerata 1,5 gradip ataanniarnissanut anguniakkamut pisussaaffik sukataarutigineqanngitsoq taanna aamma isumaqarpoq.

Taamaakkaluartoq ICC-p oqariartuutai inassuteqaataallu tusarneqartut taanna isumaqarpoq:

- Aallartitagut assigiinngitsorpassuarni oqariartuutiminnik apuussipput, nunarsuup ilaani nunani siuttut amerlasuut, nunap inoqqaavi, naalakkersuisoqarfiillu aallartitaat oqaloqatigaat.

- Inuusuttagut utoqqartagullu COP27-mut aallartitat nersualaarusuppakka, Sara Olsvig oqarpoq, nangipporlu:

- Issittumi nunap inoqqaavisa atugaannik pissutsinit piviusunik paasititsiniaapput. Nalitoorujussuuvoq.

Powered by Labrador CMS