Ib Uldum anniarneq neriuuteqarnerlu pillugit erinnamik saqqummersitsivoq

Erinaq saqqummersinneqartoq akeqanngitsumik tamanit tusarnaarneqarsinnaavoq, erinarsuutillu imaa tassaavoq anniarneq neriunnerlu. Erinarsuut allanit iluaqutigineqassasoq neriuutigaara, erinarsortartoq Ib Uldum oqarpoq.

Sangen "Anniarpunga" er gratis tilgængelig for alle, og kan findes i Soundcloud.

Nipilersortartoq erinniortartorlu Ib Uldum erinnamik nutaamik saqqummersitsivoq, ateqartumik ”Anniarpunga”.

Taassuma erinarsuutigaa piffissami sivitsortumi anniaateqarneq. Ilaatigut sumut saaffissaaruttarneq. Erinarsuutilli aamma sammivaa neriuuteqartoq, ikiortissaqartoq inuunerlu ingerlaqqissasoq.

Erinarsuut soundcloudimi akeqanngitsumik tusarnaarneqarsinnaavoq.

- Eqqarsarama taamatut anniaateqartut eqqarsaateqartullu allat Kalaallit Nunaanniittut aamma iluaqutigisinnaagaat. Tamanut tunniusserusukkama, paasititserusukkama kisimiinngitsut.

Ib Uldum angerlarsimaffimmini nammineq immiussisarfeqarpoq, erinarlu nammineerluni immiussimallugu. Taassuma ilisimatitsissutigaa qatanngutiminit ilisarisimasaminillu ikiorneqarluarsimalluni.

Anniaatip suliarineqarnera

Ib Uldum Sermitsiaq.AG-mut ammasumik oqaluttuarpoq nammineerluni ilungersuuteqarsimalluni. Tamassumunnga pissutaavoq ilaqutariit iluanni allanngortoqarsimanera. Nammineerlunilu nassuerutigaa taalliorsimanini erinniorsimaninilu, assut iluaqutaasimasoq.

- Oqaasinngortissinnaanngisakka taalliorninni allassinnaanerusimavakka. Tamanna oqinnerulersitsivoq. Uattullu ittut aamma amerlassasut ilimagaara, oqaluttuarpoq.

Nammineerluni erseqqissaatigaa perorsarneqarnermini sammisat oqimaannerit pillugit oqaloqateqarnissamut perorsarneqarsimanani. Naatsorsuutigilluinnarpaalu allarpassuit aamma taamatulli perorsarneqarsimassasut.

- Soorunami misigissutsit taama ammatigisumik saqqummiullugit unammillernarpoq. Kisiannili aalajangereerpunga misigisakka isertuuteqqinniarnagit, isertugaanngilarlu suli unammilligassaqarama, oqaluttuarpoq.

Qisuariartoqarluarpoq

Erinarsuut ”Anniarpunga” soundcloudimi maannamut 1200-nit tusarnaarneqarsimalerpoq.

Qisuariartullu pitsaasuupput.

- Arlallit facebookikkut saaffiginnipput, taamalu ammatigisumik saqqummerama qujallutik. Ilai aamma allapput paasisimallugu ajornartorsiutitik pillugit kisimiinnatik. Ingerlaqqinnissannut nukissanik tunisipput, ilaana, oqarpoq.

Taassuma erseqqissarpaa erinaq imminerminut namminerlu misigisaminut tunngammat. Nammineerlunilu neriuutigaa tusarnaartut namminneq misigisaminnut erinaq tunngatikkumaaraat, namminneerlutik iluaqutigisinnaaniassammassuk.

Powered by Labrador CMS