IA: Uranisiorneq pinnagu aalisarneq tapersersorneqarli

Naalakkersuisut Kuannersuarni uranisiornissamut taarsiullugu Narsami Kujataatalu sinnerani aalisarnerup pitsanngorsaaffigineqarnissaanut periarfissat misissortariaqarpaat, IA-mi politikkikkut oqaaseqartartoq oqarpoq.

Coronamik ajornartorsiuteqarneq Kalaallit Nunaanni suli atuutilivinngitsoq, Aatsitassanut Naalakkersuisup Vittus Qujaukitsup nunami maani aatsitassarsiornerup sukkanerusumik ingerlanneqarnissaa oqaatigaa.

Qujaukitsullu nuannaarutiginerarpaa, ilaatigut Narsap eqqaani Kuannersuarni aatsitassanik qaqutigoortunik piiaanissamut suliniutip ingerlalluarnera.

Illuatungiliuttutut partii IA suliniummut aatsitassarsiorfiuniartullu ineriartortinneqarneranut akerliulluni siusinnerusukkut oqaaseqartarsimavoq, tamatut ingerlatsiniarneq kukkusuusoq, partiip politikkikkut oqaaseqartartua Aqqaluaq B. Egede oqarpoq:

- Narsami Urani pinnagu kujataani raajartassiinissaq inuussutissarsiutinillu siuarsaanissaq suleqatigiissutigisigu. Aalisarneq uneqqittussaanngitsoq aallartitsigu. Siunissaq minguitsoq inunnut orniginartoq, tusagassiorfinnut nalunaaruteqarnermi allappoq.

Egede: Inuussutissarsiutit allat innarlissavai

Aqqaluaq B. Egede isumaqarpoq, aatsitassarsiorniarnerup, uranimik piiaanissamik pilersaaruteqarnermik imaqartup Narsami inuussutissarsiutit allat innarlissagai:

- Illoqarfik Narsaq innuttaasalu urani annassutigissagaat isumaqalersitsiniartoqarpoq. Naak uran inuussutissarsiutinik minguitsunik, aalisarnermik, nunalerinermik takornariaqarnermillu tunngaveqartunik nungusaasussaasoq. Raajarniarluni aalisarneq tapertaalertariaqarpoq. Raajarniarluni aalisarneq aningaasarsiorfiulluartoq aallarteqqinneqartariaqarpoq, Aqqaluaq B. Egede allappoq.

Aatsitassanut Naalakkersuisup Vittus Qujaukitsup siusinnerusukkut oqaatiginikuuaa, aatsitassarsiorneq Kalaallit Nunaata pisariaqartitaanik suliffinnik nutaanik pilersitsissasoq akileraarutitigullu isaatitsissutaassasoq.

Powered by Labrador CMS