IA: Siumut Tunngaviusumik inatsisissaq pillugu isumalioqatigiissitami namminissarsiorpoq

Siumumit toqqarneqarluni siulittaasutut inissisimasup, Doris J. Jensenip tunuarnerata kingorna, Tunngaviusumik inatsisissaq pillugu isumalioqatigiissitap sulinera pillugu nalorninartorsiortoqaqqilerpoq. Inuit Ataqatigiit siulersuisui taama isumaqarpoq.

Siulittaasunngortussamik suli nassaartoqanngilaq, isumalioqatigiissitap sulinissaanut tunngaviusut malillugit Siumut siulittaasumik toqqaasussaavoq.

Isumalioqatigiissitaq assoralisimaarpoq

IA-p siulersuisuunerisa arfininngornermi ualikkut tusagassiutinut nalunaaruteqarlutik Siumut aamma Naalakkersuisut isornartorsiorpai.

- Tunngaviusumik Inatsisissaq pillugu Isumalioqatigiissitaq assoralisimaarpoq, IA allappoq. IA isumaqarpoq suliassat inuttalersugaaneralu pillugit Siumut iluminni piffissaagallartillugu inissiisimanngitsoq, tamannalu ”isumatusaartumik eqqarsaatigilluakkamillu sulinissamik innarliisuusoq ”.

- Suliap qanoq pingaaruteqartiginera pinnagu politikkikkut saqqumilaarniarfissatut pinnaaffittullu Isumalioqatigiissitap inissisimajuarnera suliassamut paatsoorneruvoq, namminissarsiorneruvoq akuersaarneqarsinnaanngitsoq , IA-p siulersuisuunerinit nalunaarutigineqarpoq, siulittaasuusimasup tunuarnermini, siulittaasuuffik piffissaq tamakkerlugu atorfittut inissisimasariaqarneranik erseqqissaateqarnera pillugu allalluni.

Siumut akisussaaffimmik tigusissaaq

- Isumalioqatigiissitaq ingerlaqqissappat Siumup qanoq Isumalioqatigiisitami inissisimaffeqarnini erseqqissumik oqaatigisariaqarpaa. Taamatuttaarlu Naalakkersuisut Isumalioqatigiissitap pilersinnissaanut aalajangiisinnaassuseqalersinneqarlutik piginnaatitsissummik tunineqarsimasut akisussaaffimmik tigusisariaqarput. Akisussaaffik imatut paasillugu Isumalioqatigiissitap sinaakkutaanik pitsaasunik aammalu tatigineqarsinnaasumik sulinissaanut akisussaassuseqarnermik , IA allappoq, ilisimatitsillunilu isumalioqatigiissitaq pillugu Siumumut oqaloqatigiinnissamut qaqugukkulluunniit piareersimallutik.

Siumut siulittaasuata Kim Kielsenip tusagassiortunut kingullermik katersortitsigami erseqqissarpaa Tunngaviusumik inatsisissaq pillugu isumalioqatigiissitaq “tunulliunneqanngitsoq”, naak Doris J. Jensen siulittaasutut tunuarnerminut tunngatillugu taama oqaraluartoq.

Paasinninneq

IA isumaqarpoq Tunngaviusumik inatsisissaq pillugu isumalioqatigiissitaq pillugu Siumut ersarissumik nalunaaruteqartariaqartoq, sulilu nalunaaruteqartoqannginneq pillugu IA ima paasinnippoq, tassa ”Isumaloqatigiissitap suleriaqqinnissaa Siumup tunngaviatigut isumaqatiginngikkaa ”.

- Isumalioqatigiissitaq tutsuiginartumik aammalu uppernassusilimmik ingerlaqqissappat iliuuserineqarsinnaasutut siunnersuutigaarput Tunngaviusumik Inatsisissaq pillugu Isumalioqatigiissitap sulinerata aaqqissugaanera allanngortinneqassasoq. Taamaaliornikkut isumalioqatigiissitami suliaqartut suliassamut ilisimaqartunit politikeriunngitsunik inuttalersorneqaqqullugu, taamaalioraanni aatsaat isumalioqatigiisitap uppernassusaa pilersinneqassammat , IA allappoq, inuttalersueriaatsimullu isummernini taamaalilluni uteqqillugu.

Demokraatit killormut isumaqalernerat

Naalakkersuisoqatigiit aningaasanut inatsisissatut siunnersuut saqqummiummassuk allaqqagaluarpoq ilaasortat politikikkut suliaqartussatut qinerneqarsimasut akissarsiaqartinneqalissasut. Tassanili Vittus Qujaukitsup siunnersuut tunuartittariaqalersimavaa, oqallinnerup nalaani Demokraatit tapersiinertik tunuartimmassuk, naak partiip siulittaasorigallangaata Nivi Olsenip Tunngaviusumik inatsisissaq pillugu Isumalioqatigiissitami siulersuisuni atuunnini aqqutigalugu, akissarsiaqartitsisalernissamut innersuussut Naalakkersuisunut nassiunneranut peqataasimagaluartoq.

Suleqartigiissitsisut isumalioqatigiissitamit tunuarput, Atassutillu kissaatiginerugaluarpaa isumalioqatigiissitap unitsinneqaannarnissaa.