urandebat

IAs gruppeformand: Naalakkersuisoq eqqunngitsumik oqaluppoq

IA-meersup Agathe Fontain-ip Naalakkersuisunut ilaasortaq Jens-Erik Kirkegaard erloqinartumik unnerluutigaa

Agathe Fontain: - Jens-Erik Kirkegaard eqqunngitsumik oqaluppoq

Sisamanngormat akuersaanngilluinnarnerup atorunnaarsinneqarnissaa pillugu oqallinnermi IA-p Demokraatillu inuussutissarsiornermut aatsitassanullu Naalakkersuisoq Jens-Erik Kirkegaard, Siumut, tatiginninnginnermik oqaaseqarfigaat tunuarnissaalu piumasaralugu, pissutigalugu, taakkua oqarnerattut, paasissutissanik eqqunngitsunik saqqummiussisimammat - Inatsisartuniinnaanngitsoq, aammattaarli innuttaasunut tamanut. Tunuartitsiniarnerat iluatsinngitsoorpoq.
Tallimanngormat IA-p Inatsisartuni gruppiani siulittaasoq Agathe Fontain tusagassiorfinnut nalunaaruteqarpoq, tassuuna Jens-Erik Kirkegaard eqqunngitsumik oqaluttutut unnerluutigalugu. Eqqunngitsunik paasinerluutaasinnaasunilluunniit paasissutissiisarnerarlugu.
Taamaasilluni Agathe Fontain allappoq:
"Aaatsitassaqarnermut Naalakkersuisup innuttaasut eqqunngitsunik paasissutissittarpai.
Aatsitassaqarnermut Naalakkersuisoq innuttaasunik eqqunngitsumik paasissutissiinerartaratsigu tunngaveqanngitsumik oqalunngilagut. Pissutsit piviusut taamaapput. Aatsitassaqarnermut Naalakkersuisoq tusagassiuutit assigiinngitsut aqqutigalugit arlaleriarluni innuttaasunut eqqunngitsunik paasissutissiisarpoq attueqqusinngilluinnarnermik atorunnaarsitsinerup kingunissai pillugit.

Aatsitassaqarnermut Naalakkersuisoq KNR TV-iikkut internet-ikkullu oqaluttarpoq taamaallaat uranip saniatigooralugu pissarsiatut piiaarneqarnissaa isummerfigineqartussaasoq. Taamatut oqarneq eqqunngilluinnarpoq, aammalu sapaatip akunnerini pisunilu assigiinngitsuni arlalinni taamatut kukkusumik nalunaaruteqartoqartarmat tamanna innuttaasunik piaaraluni paasinerluutaasinnaasunik paasissutissiinertut oqaatigineqartariaqarpoq. Tusagassiortunit aammalu § 37 naapertorlugu apeqquteqaat (nr. 207) oktoberip 17-iani ullulerneqarsimasoq aqqutigalugu Aatsitassaqarnermut Naalakkersuisoq kukkunerminik naqqeeqquneqartarsimagaluarpoq, taamaasiortarsimananili.
Qulequtaq taasissutissaq
Akerlianilli oktoberip 17-iani 2013-imi immikkoortoq 88 pillugu oqallinnermi Aatsitassaqarnermut Naalakkersuisup oqaluttarfimmit piaaraluni eqqunngitsunik paasinerluutaasinnaasunillu paasissutissiisarnini attallugulu nangippaa. Tamanna pivoq nal. 16.27 Inatsisartunut ilaasortap Sara Olsvigip Aatsitassaqarnermullu Naalakkersuisup akioriinneranni. Akioriinnermi tassani Naalakkersuisup aalajangiusimavaa aalajangiiffigisassatut siunnersuut uranimik saniatigooralugu pissarsiatut piiarneqarnissaanik akuersinermut taamaallaat tunngasoq. Oqaatigineqareersutut tamanna eqqunngilluinnartumik paasissutissiineruvoq, tamannalumi Aatsitassanut Ataatsimiititaliap aamma uparuarpaa. Attueqqusinngilluinnarnerup atorunnarsinnissaa pillugu ataatsimiititaliap isumaliutissiissutaani ima allassimasoqarpoq: “Uranip aatsitassalluunniit qinngornillit allat taamaallaat saniatigut tunisassiarineqartussatut piiarneqarsinnaanissaannik qulequtaq taasissutissaq imaqanngilaq.”
Oqaluttarfik innuttaasunik piiaraluni eqqunngitsunik paasissutissiinermut atorneqarpoq
Inuit Ataqatigiit akuersaarsinnaanngilarput oqaluttarfiup innuttaasunut piaaraluni eqqunngitsunik oqalunnermut atorneqartarnissaa. Inatsisartut Naalakkersuisullu tatiginassusiat taamatut innarlerneqarpoq innuttaasullu akornanni naalakkersuinikkut siuttunik nalinginnaasumik tatiginninnginnermik pilersitsilluni. Tamanna pillugu Demokraatillu piumasarisimavarput Aatsitassaqarnermut Naalakkersuisup tunuarnissaa, Agathe Fontain allappoq.
Taassuma ministerip akisussaassueeqarneranut inatsit innersuussutigaa (Naalakkersuisunut ilaasortat akisussaanerat pillugu Inatsisartut inatsisaat), Agathe Fontain malillugu § 6-imi ersarivissumik allassimammat:
Naalakkersuisunut ilaasortaq § 10 naapertorlugu pineqaatissinneqassaaq piaaraluni imaluunniit mianersuaalliorujussuarnermigut Inatsisartut Naalakkersuisullu pillugit Inatsisartut inatsisaat inatsisilluunniit allat malillugit imaluunniit atorfimmi suunera malillugu imminut pisussaaffigisassanngortitaasut malillugit iliunngikkuni.
Imm. 2. Imm. 1-imi aalajangersagaq aamma atorneqartassaaq Naalakkersuisunut ilaasortaq eqqunngitsumik paasinerluutaasinnaasumilluunniit inatsisartunut paasissutissiisimappat imaluunniit inatsisartut oqaluuserisassamik oqaluuserinninneranni paasissutissanik oqaluuserisap inatsisartunit aalajangiiffigineqarnissaanut annertuumik pingaaruteqartunik nipangiussisimappat.
Inatsisartunut qinigaasup Naalakkersuisunulluunniit ilaasortanngortitaasup kialluunniit inatsit taanna nalunngittussaavaa. Tamatta taassuminnga pisarpugut nassuiaanneqartarlutalu. Taamaammat sumilluunniit patsisissaqanngilaq oqassalluni inatsit taanna naluara, Agathe Fontain tikkuaavoq.
– Isumarput malillugu suliami matumani § 6, stk. 2 ilumut unioqqutinneqarrtoq nalornisigineqarsinnaanngilaq. Atorfilittat pikkorissut tunulequtaralugit taamatut nammineerluni aalajangiiffigisassatut siunnersuutigisaq pillugu sapaatip akunnerini arlalinni paatsuungasimaartoqarsinnaanngilaq naqqiivigineqaranilu kukkusumik oqaaseqaqattaarluni. Taamaammat isummiuttariaqarparput taasissutissap uranimik saniatigooralugu pissarsiatut piiarneqarnissaanut tunngasuunnginnera Aatsitassaqarnermut Naalakkersuisup ilisimajuarsimassagaa. Siunnersuutip pingaaruteqassusia taamaasillugu piaaraluni nikasaarneqarpoq. Isummani illersornagu aalajangerpoq piaaraluni eqqunngitsunik paasissutissiiniassalluni, IA-p gruppia tamaat sinnerlugu Agathe Fontain naliliivoq.
Ikinnerussuteqartut tatiginninnginnermik takutitsinerannik Naalakkersuisooqatigiit sumiginnaanerat tupinnarpoq
Agathe Fontain isumaqarpoq ikinnerussuteqartut tatiginninnginnermik takutitsinerannik Naalakkersuisooqatigiit allaat tunngavilersuutitaqanngitsumik sumiginnaanerat tupinnarluinnartuusoq.
– Naalakkersuisooqatigiit Aatsitassaqarnermut Naalakkersuisumik illersuinertik tunngavilersunngimmassuk pissutaaginnarpoq atorsinnaasunik tunngavissaqanngimmat. Pissutsit piviusut taamaareerput. Kisiannili Inatsisartut Naalakkersuisullu tatiginassusiat siuneqassusiallu siuttup kialluunniit ilumoortup sernissortussaasariaqaraluarpaa tamannalu pillugu ministeri soraarsillugu. Ministeri kinaluunniit immikkut ittumik akisussaassuseqartuuvoq, Naalakkersuisullu tamatuminnga akuerinninnginnertik naammassinnissinnaannginnertillu takutippaat, Agathe Fontain erseqqissaavoq.

Powered by Labrador CMS