Folketingimi ammaaneq
IAp Thorningip urani pillugu isumaa nuannaarutigaa - Siumut kamappoq
Statsministerip Folketingimi ammaalluni oqalugiaataa malissagaanni Nunatsinni uranimik qanittumi qalluisoqarnissaa ilimananngilaq
Folketingimi sinniisussatut ataatsimeeqataasoq Johan Lund Olsen IA-meersoq iluarisimaarinnilluni statsministerip oqalugiaataanut takeqisumut naalaarpoq.
- Statsministerip (Helle Thorning Schmidt Socialdemokraatiniit, aaqq.) oqaasissakka anippaalusooq, oqalugiaammut Johan Lund Olsen oqaaseqarpoq.
Ilisimaneqartutut Inuit Ataqatigiit uranimik allanillu radioaktiviusunik aatsitassarsiornissamut akerliulluinnarpoq.
Johan Lund Olsen isumaqarpoq Nunatsinni aatsitassarsiornissamut qallunaat naalakkersuisut tapersersuigaluartut pissutsit allaalluinnartartut uran aamma aatsitassat radioakvitiviusut oqaluuserineqartillugit.
- Statsministerip oqalugiaammini naqissuserpaa Naalakkersuisut inatsit tunngaviusoq namminersornermullu inatsit ataqqisariaqaraat. Sinaakkutit taakku Naalakkersuisut malittariaqarpaat, Johan Lund Olsen Sermitsiaq.AG-mut oqarpoq.
Tassani IA-meersup namminersorneq pillugu inatsimmik ilusilersueqataasup innersuuppaa namminersorneq pillugu inatsit aamma qallunaat tunngaviusumik inatsisaat tassani allassimasoqarmat sillimarniarnermut, illersornissamut nunanullu allanut politikki Danmarkip akisussaaffigigaa
Doris ugguarpoq
Siumut sinnerlugit Folketingimut ilaasortaq Doris Jakobsen Nunarput pillugu statsministerip oqaaseqarneranik qujarussivoq. Aamma tassani pivai Helle Thorning Schmidtip oqaaseqarnera utoqqaat pilersugassat amerliartortut landskarsimut artukkiiartorlutik.
Taamaattoq uran pillugu isumaqatigiinnginneq uggoraa.
- Uggornarpoq Nunatta Danmarkillu akornanni isumaqatigiinngittoqarmat, kisianni nalunngilara Naalakkersuisut pingaartikkaat aatsitassarsiorneq pillugu ineriartortitsinermi oqimaaqatigiissumik pissuseqarnissaq, Doris Jakobsen Sermitsiaq.AG-mut oqarpoq.
Naalagaaffeqatigiinneq aporfiliivoq
Inatsisartut siulittaasuat Lars-Emil Johansen Siumumeersoq statsministerip oqalugiarnerani tusarnaartut akornanniikkami oqalugiaammik isornartorsiuivoq.
- Statsministerimmi toqqaannartumik oqaatigaa naalagaaffeqatigiinneq Nunatta ineriartornissaanut aporfiusoq. Ajornartorsiutit eqqartorpallaarpaat aaqqiissutissat pivallaarnagit, Lars-Emil Johansen oqarpoq.
Kaj Leo eqqissiunnaarpoq
Savalimmiuni naalakkersuisut siulittaasuat Kaj Leo Holm-Johannesen Sambandsflokkurinimeersoq naalagaaffeqatigiinnerup eqqartorneqarneranik aamma qujarussivoq, taamaattoq piffissami aggersumi eqqissiunnaartoqarnissaanik ilimasuppoq.
- Paasinarpoq ajornartorsiuterpassuaqartoq aamma suliassarpassuaqartoq, Savalimmiuni naalakkersuisut siulittaasuat Sermitsiaq.AG-mut oqarpoq.