suliffissaaleqineq

IAp Inuusuttaat: Inuusuttut suliffissaaleqinerat ima anigorneqassaaq

Suliffissaaleqisut suleqatigineratigut iliuuseqartoqartalertariaqartoq Inuusuttut Ataqatigiit siulittaasuat Múte Bourup Egede oqarpoq

Inuusuttut Ataqatigiinni siulittaasoq Múte Bourup Egede

Suliffissaaleqisuni 3.167-iusunit 18-iniit 34-nut ukiulliit 1.446-sut, procentinngorlugu 46 procenterluinnangajaasullu Sermitsiaq.AG sisamanngornermi allaaserisaqarpoq. Tassani inuusuttut suliffissaaleqisut amerlavallaarujussuartut Inuusuttut Ataqatigiit siulittaasuat isummersorpoq.

Inuusuttut suliffissaaleqinerat qanoq annikillisarneqarsinnaanersoq Múte Bourup Egede itisiliivoq.

- Suliffeqarfiit inuussutissarsiornikkut suliaqartut assigisaannulu suliaqartut peqatiginerullugit suliffissaaleqineq akiorneqartariaqarpoq. Suliffeqarfiit peqatiginerullugit maannamiit ilinniarsimasut amerlanerulernissat anguneqarsinnaavoq.

- Suliffissaaleqisut kommunimut saaffiginnikkaangata suliffissaaleqisoq peqatigalugu sulileqqinnissaamut imaluunniit ilinnialernissamut pilersaarusiortoqartariaqarpoq, Múte Bourup Egede oqarpoq.

Inuusuttut Ataqatigiinni siulittaasup siunnersuutigaa suliffeqarfiit suliffissaaleqinermut akiuiniarnermut suleqataanerusariaqartut, kiisalu suleqatigiinnikkut tamanna sulissutigineqarnerusariaqartoq oqariartuutigalugu.

- Ataatsimoornikkut angusavut amerlanerusinnaapput. Suliffeqarfiit suleqatigineqarnerisigut ilinniarfeqarfiit qaffassarneqarsinnaapput, Múte Bourup Egede oqarpoq.

Suliffissaaleqinerup suna tunngavigineraa aamma misissorneqartariaqartoq isumaqarpoq.

- Innuttaasunut kiffartuussinerit suliffissaaleqisunullu sullissisarnerit pitsaanerusariaqarput, Inuusuttut Ataqatigiinni siulittaasoq oqarpoq.

Powered by Labrador CMS