IA: Nuup Kangerluani qaleralinnik pisassiissuteqartoqartalerli
Nuup Kangerluani pisassiissuteqartalernissamut maanna Naalakkersuisut pilersaaruteqannginnerat, Sofia Geislerip 'ernumanartutut' oqaatigaa.
Qalerallit Nuummi tunineqartartut 2010-miilli oqimaassusaat agguaqatigiisillugu 1,5 kiilumit 900 gramimut appariarsimavoq.
Qalerallit milliartornerat aalisarpallaarnermit pissuteqartoq, aalisarnermut naalakkersuisup, Nikkulaat Jeremiassenip (S), paragraf 37-mut IA-meersumut Sofia Geislerimut akissuteqaammini nassuerutigaa.
- Nuup Kangerluani qaleralinniarnermi aalisapiluttoqarpoq. Nuup Kangerluani qaleraleqassuseq ulorianartorsiortinneqarpoq, Sofia Geisler akissuteqaammut qisuariaateqarluni taama allappoq.
- Taamaattumillu ernumanartutut nalilerpara Aalisarnermut, Piniarnermut Nunalerinermullu Naalakkersuisup Nikkulaat Jeremiassenip §37 naapertorlugu apeqqutinnut akissuteqarnermini kingulliugallartumi allammagu Nuup Kangerluani qaleralinniarnermi pisassiissuteqartalernissaq suli ullulerneqarsimanngitsoq.
Naak qalerallit milliartoraluartut, pisarineqartartut piffissami tassani malunnaatilimmik qaffapput. Piffissami 2013-mit 2018-imut agguaqatigiisillugu ukiumut 1.100 tonsiupput.
- Takusinnaavara Nuup Kangerluani qaleralinniarneq pillugu Pinngortitaleriffik 2014-mi Aalisarnermut, Piniarnermut Nunalerinermullu Naalakkersuisoqarfimmut allagaqarsimasoq. Allakkiap imarivaa aqutsinissamut iliuuserisassanut siunnersuut, aammalu piujuaannartitsineq tunngavigalugu aalisarnerup ingerlanneqarnissaanut innersuussutit. Innersuussutigineqarpoq Nuup Kangerluani kangerlunnilu eqqaani pisassiissutit 500 tonsinit amerlanerussanngitsut, taakkunannga amerlanerussappata tamanna ilisimatuut misissuereernerisigut aatsaat isummerfigineqassalluni, Sofia Geisler oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...