IA: Nunarput danskit isumaqatiginninniarnerinut peqataasinnaanermut qanilliallappoq
Aningaasaqarnermut ministerip Kristian Jensenip (V) nunatsinnit folketingimut ilaasortap aappaa Aaja Chemnitz Larsen (IA) Folketingimi isumaqatiginninniarnernut tamanut peqataalersinnaanngorpaa.
Kalaallit Nunaanni Folketingimut ilaasortap aappaa, Aaja Chemnitz Larsen (IA) maanna Folketingimi isumaqatiginninniarnernut tamanut peqataasinnaalerpoq. Tassa danskit partiivi allat akuersissappata. Aaja Chemnitz Larsen tusagassiuutinut nalunaarummi taama nalunaaruteqarpoq.
Aaja Chemnitz Larsen taamaalilluni nunanit avannarlernit ilaasortani kisiartaalluni isumaqatiginninniarnernut peqataasinnaanngorpoq.
- Tassa imaappoq Kalaallit Nunaannut pisanut tunngatillugu Kalaallit Nunaat tusarneqarsinnaanngorpoq. Aatsaavissuaq taamatut pisoqarpoq, angusarlu annertunerusinnaanngilaq, Aaja Chemnitz Larsen oqarpoq.
Suliniuteqartoq
Maanna qinigaaffik 2015-imili aallartimmat Aaja Chemnitz Larsenip Kalaallit Nunaata sunniuteqarnerunissaa suliniutigaa. Politikkikkut isumaqatiginninniarnernut Kalaallit Nunaannut tunngasunut arlalinnut peqataanissamut piumasaqartarpoq.
Tamannalu maanna kinguneqarpoq, IA-mi politikeri isumaqarpoq.
Taamaattorli danskit partiivi allat Aaja Chemnitz Larsenip isumaqatiginninniarnerni assitigiinngitsuni Kalaallit Nunaannut tunngasuni peqataanissaa akuereqqaartariaqassavaat. Tamatuma qaqugu pisinnaanera, tusagassiuutinut nalunaarummi ilisimatitsissutigineqanngilaq.
Isumaqatiginninniarnerit arlallit
- Isumaqatigiissitsiniarfinni misilittakkakka Kalaallit Nunaannut iluaqutaapput Inatsisartunilu partiit akimorlugit politikkikkut sulinermi kulturimut nutaamut aqqutissiuussisinnaallutik. Periuseq meeqqat atuafiannut, peqqinnissamut inunnillu isumaginninnermut tunngatillugu atorneqarsinnaalluarpoq, taakkunanimi isumaqatigiissutigisinnaasagut amerlapput, suliallu piffissami sivisuumi aalaakkaasumillu kinguneqarnissaat anguneqarsinnaalluni, taanna tusagassiuutinut nalunaarummi oqarpoq.
Isumaginninnermut isumaqatiginninniarnerit saniatigut, Aaja Chemnitz Larsenip Inuit Ataqatigiit politiinut, pinerluttunik isumaginnittoqarfimmut, illersornissaqarfimmut, tusagassiutitigut isumaqatigiinniarfimmut kiisalu eqqumiitsuliornermut tapiissummut tunngasutigutisumaqatigiinniaqataassaaq.