IA: Namminiilivinnissaq innuttaasunik imminut pilersortunik pisariaqartitsivoq
Ukiuni kingullerni namminiilivinnissaq pillugu oqallinneq allanngorsimavoq. IA-mi siulittaasoq Múte Bourup Egede ukiortaassamut AG-mit apersorneqarnermini oqarpoq.
Namminiilivinnissaq pillugu oqallinneq allanngorsimasoq, IA-p siulittaasortaava Múte Bourup Egede isumaqarpoq.
Taanna AG-mit apersorneqarnermini taama oqarpoq.
- Ataatsimut isigalugu namminiilivinnissamut oqallinneq piffissami kingullermi initunerpaat ilaajunnaarsimasutut ilaatigut taaneqarsinnaagunarpoq. Qanoq ililluni anguneqarnissaanut oqallinneq imaqarnerulersimasutut nalilerusuppara. Ataatsimoorluta namminiilivinnissatta ilusilersornissaanut anguniarneranullu immitsinnut naalarnisinnaanissarput avaqqussinnaanngilarput. Inuit Ataqatigiinnullu siunertaajuassaaq namminiilivinnissarput, tamannalu peqataatitsiffiusumik, isumatusaarluta akisussaassuseqartumillu sulinikkut angusariaqarparput. Isumassortariaqartortattami isumassorneqarnissaat puigunngisaannassavarput. Nunami imminut napatittoq toqqammaveqassaaq, ilaqutariinnit innuttaasunillu amerlanerpaanit imminut pilersortunit innuttaqarnermigut, taanna oqarpoq.
AG-p partiimi siuttut tamaasa ukioq qaangiutilersoq kingumut qiviarfiginissaanut siunissarlu pillugu apeqquteqarfigisimavai. Apersuinerit tamakkiisut aviisimi atuarsinnaavatit: