IA: Naalakkersuisut akisussaaffimmik ingerlatitseqqissimapput
Naalakkersuisut akisussaaffimminnik eqqumaffiginnissimasariaqaraluarput taamalu Niuernermik Ilinniarfimmi ilinniartitaanermut tunngasuni kukkuluttornerup eqqartuussissuserisumut misissuititsinermut 1,5 millioner koruuninik atuinermut taarsiullugu iliuuseqarsimasariaqaraluarlutik, politikeri IA-meersoq isumaqarpoq.
Naalakkersuisut sapaatip-akunnerani matumani pissutsit NI Nuummi ilinniakkat marluk ilinniarnerup aallartinnissaa sioqqutitsiarlugu taamaatitsinermik kinguneqartut eqqartuussissuserisumit misissuiffigineqarnerannit inerniliussat tamanut saqqummiuppaat.
Misissuititsineq 1,5 millioner koruuninik akeqarpoq, aningaasanilli atuilussinnarnerusimasoq, Sofia Geisler (IA), Inatsisartuni Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliami ilaasortaasoq, isumaqarpoq.
Naalakkersuisut ilinniakkanut inatsisitigut tunngavissat aningaasaliinissallu inissinneqarsimannginnerat pissutigalugu ilinniakkat aggustimi 2019-imi aallartinnissaraluannik taamaatitsiniarlutik aalajangernerat paasisinnaanerarpaa:
Akisussaaffimmik ingerlatitseqqittut
- Tamatumanili aamma killissamik qaangiisoqarpoq. Naalakkersuisut tamatuma kingorna pisimasunik ingerlaannaq kinguneqartitsinissaat pissusissamisoornerpaasimassagaluarpoq, qitiusumik allaffeqarfiup inatsisinik aqutsinissamut aningaasaqarnermillu nakkutilliinissamut aqutseriaaseqarnissaa ilimagisariaqaraluarmat, tamannalu immini ingerlariaqqiffiusumik inerniliinissamut naammassimasariaqaraluarmat, Sofia Geisler oqarpoq nangillunilu:
- Taarsiullugu uanga isinnik akisussaaffik eqqartuussissuserisut suliffeqarfiannut ingerlateqqinneqarpoq. Aqutsinermut akisussaaffimmik avataaneersunut suliassanngortitsisoqarsinnaanngilaq. Naalakkersuisut aalajangiinernik suliaqartussaapput, oqarpoq.
Ilinniakkat taakkua marluk februaarimi 2020-mi aallartinneqarput – tassa ilinniarfiup pilersaarutigeqqaagaanit ukiup affaanik kingusinaarlutik.
2020-mut aningaasanut inatsisissaq naapertorlugu NI Nuup ilinniakkanik 2020 tamakkerlugu neqerooruteqarsinnaanissaanut 2 millioner koruunit immikkoortinneqarsimapput.
Naalakkersuisut siorna septembarimi aalajangerput, ilinniartitaanikkut kukkuluttortoqarneranut inatsisitigut akisussaaffimmik inissiisoqarsinnaanera paaasiniarlugu eqqartuussissuserisumut misissuisitsisoqartariaqartoq.
Inerniliineq ilimagisaasoq
Misissuinermi inerniliineq naapertorlugu taamaaliortoqarsinnaanngilaq, misissuinermillu NI Nuummut siulersuisut, naalakkersuisoqarfik naalakkersuisorlu akisussaasoq taamaalillutik pinngitsuutinneqarlutik.
- Inernera ilimagineqarsinnaareerpoq. Nutaarsiassaqanngilaq. Suli aallaavimmiippugut, tassa pisussaasimanngikkaluartumik pisoqarsimasoq, kisiannili kinguneqartitsinissamik suli aalajangiisoqarsimanani, Sofia Geisler oqarpoq.
Naalakkersuisut misissuinermit inerniliussat tusaatissatut tiguneqarput, assingusunillu kukkusoqaqqinnginnnissaa Ilinniartitaanermut Naalakkersuisoqarfimmut erseqqissaatigineqarluni.