IA: Mittarfiliorniarnerit allanngortinneqarsinnaapput
Mittarfiliorniarnermi aningaasaqarneq ajalusuulerpoq, tamatumalu kinguneranik suliassatut aaqqissuussat tamarmik naggataatigut iluarsaanneqartariaqalersinnaapput, IA-p siulittaasua siunersiueqatigiittoqareersoq naliliivoq. Partii Naleraq isumaqarpoq mittarfiliassat tamarmik naanninngortinneqartariaqartut.
Aningaasaqarnermut Akileraartarnermullu Ataatsimiititaliami pingasunnogrmat siunersiueqatigiittoqarmat saqqummiunneqarpoq, Kalaallit Airportsip aningaasaqarneq imminut ataqatigiissinniarlugu Qaqortumi naannerusumik mittarfiliorniarluni timmisartoqarfiullu illutassaanik mikinerusunik sanaartorluniarluni suliassamik allannguinissaq sulissutigigaa.
Tamanna KNR-imit ilisimatitsissutigineqarpoq.
Illuatungiliuttut partiiata IA-p siunersiueqatigiittoqareersoq oqaatigaa, mittarfiliassat naggataatigut allanngortittariaqarsinnaasut, aningaasaqarneup ajalusuulinnguatsiarnera pissutigalugu.
- Inuiaqatigiit aningaasaqarnerannut sunniutaasussat nalilersorlugit maanna aallartinneqarsimasut uppernarsaaffigineqarpugut, sanaartornissamullu sinaakkutissat eqqarsaatigalugit tamanna akisuallaalersimavoq, IA-p silittaasuat ataatsimiititaliamilu ilaasortaq Múte B. Egede oqarpoq.
Allanut tusarliunneqartussaanngitsumik ilisimatinneqarnissamut qilanaartoq
Taassuma erseqqissaatigaa, suliassat qanoq allanngortinneqarsinnaanerinut IA suli siummersimanngitsoq. Naalakkersuisummi allanut tusarliunneqartussaanngitsumik kingusinnerusukkut aatsaat ilisimatitsissuginiarmassuk, mittarfiliornermi aningaasaqarnerup qanoq inissisimanernut tunngassuteqartut:
- Allannguisoqassappammi aaqqiissutissat ilaat taamatut ittut Inatsisartuni siullertut oqaluuserineqaqqaartussaapput. Suliassanullu tunngatillugit aningaasaqarnerup qanoq inissisimanera tamakkiisumik ilisimannginnatsigu, aaqqiissutaasinnaasumik tikkuagaqarnissaq aamma ajornakusoormat, Múte B. Egede oqarpoq.
Naalakkersuisut septembarip 24-ani aningaasaqarneq pillugu allanut tusarliunneqartussaanngitsumik ilisimatitsissuteqarnissaat qilanaaraa.
Pele: Kukkussuteqarsimanermik nassueruteqarneq pitsaasuuvoq
Partii Naleqqami Qaqortumi timmisartoqarfiliornissap allanngortinneqarsinnaanera kisiat oqaluuserineqarumanngilaq. Suliassat tamarmik, Nuummi Ilulissanilu timmisartoqarfissat nutaat ilanngullugit allanngortinneqartariaqartut, partii sinnerlugu ataatsimiititaliami ilaasortaq Pele Broberg isumaqarpoq:
- Aallaqqaammulli oqaatigisimavarput, akilersinnaasatsinnik peqassasugut.
- Naalakkersuisut kukkussuteqarsimanerminnik nassuerutiginnissinnaappata, suliassat tamarmiusut allanngortinneqarnissaannut peqataassaagut, tassa sumiiffinni pingasuusuni (Nuuk, Ilulissat Qaqortorlu) mittarfissat tamarmtik 1199 meiiterisut takitigisunngorlugit allanngortissinnaaqqullugit, Pele Broberg oqarpoq.
Siumup neqeroortitseqqittoqarnissaa takoqqaarusukkaa
Siumumi ilaasortap Karl Kristian Krusep mittarfissat naannerusut imaluunniit timmisartoqarfiliorniarnermi allannguutissat allat suli oqaluusererusunngilai. 2018-imi aalajangiunneqarsimasut maannamut attatiinnarusuppai:
- Tamanna Inatsisartut siusinnerusukkut aalajangiunnikuuaat. Siumumi tamatumunnga tunngatillugu isumarput allanngornikuunngilaq, Karl Kristian Kruse oqarpoq.
- KAIR neqeroortitseqqinniartoq paasivarput. Allatut nalilersuitinnata neqeroorutissat qanoq imaqarnersut takoqqaarusuppavut, taanna oqarpoq.