IA: Ministerip akissutaa akuersaarneqarsinnaanngilaq
Folketingimi ilaasortap Aaja Chemnitz Larsenip (IA), meeqqat kinguaassiuutitigut atornerlunneqarsimatillugit pineqaatissiissutaasartup sakkortusineqarnissaanik politikkikkut kissaateqarnermut inatsisinik atuutsitsinermut ministerip Nick Hækkerupip akissutaa naammaginngilluinnarpaa.
Inatsisinik atuutsitsinermut ministerip Nick Hækkerupip Inatsisinik Atuutsitsinermut Naalakkersuisumut Martha Abelsenimut allagaani decemberip 20-aneersuni atuarneqarsinnaavoq, pinerluuteqarsimasunut inissiisarfinni inissaqartitsinnginneq naammattunillu sulisussaqannginneq tunngavilersuutigalugu maanna ukiuni qulini pineqaatissiissutaasartoq sakkortusineqarsinnaanngitsoq.
Aaja Chemnitz Larsen isumaqarpoq, Danmarkimi naalakkersuisut Naalakkersuisut peqatigalugit aaqqiissutissarsornissamut pisussaaffeqartut.
- Pinerluutigisap pineqaatissiissutillu imminnut ataqatigiittannginnerat takujuarparput. Pinerluuteqarsimasoq, assersuutigalu meeqqamik kinguaassiuutitigut atornerluisimasoq, qaammatini arfinilinni, aqqaneq-marlunni 18-ininiluunniit pinerluuteqarsimasut inissiisarfianiitinneqartartoq, meeraq inuunini naallugu kingunerlutsitsilluni inuuneqartarpoq. Tamatuma naapertuilluassusermik isiginninnerput innarlertarpaa, 2020-milu inuunitsinnut naapertuunnani, siger Inuit Ataqatigiit sinnerlugit folketingimi ilaasortaq Aaja Chemnitz Larsen tusagassiorfinnut nalunaaruteqarnermi oqarpoq.
Sofia Geisler tupigusuttoq
IA sinnerlugu Inatsisartuni ilaasortap Sofia Geislerip siorna aalajangiiffigisassatut siunnersuutigaa, kinguaassiuutitigut atornerluisimasunut pineqaatissiissutaasartup sakkortusitinneqarnissaa. Taamaammat tupigusuutigaa, Martha Abelsenip akissummini inatsisitigut pineqaatisseeriaatsit, danskit pinerluuteqarsimasunut inissiisarfinnut inissiisarnerannut, ukiunut 16-inut sivitsorneqarsimasumut assingusoq atuutsinneqalernissaanik oqariartuuteqariasaarnera.
- Suliami pineqartariaqaraluarpoq, pinerluttulerinermut inatsit sakkortunerusumik pineqaatissiinissamut periarfisseereersoq, sooq kinguaassiuutitigut innarliisimanerit ulluni 30-niit ukiut tallimat angullugit inissiisoqartarnerata oqaluuserineqarnissaa, Sofia Geisler Sermitsiaq.AG-mut oqarpoq.
Pinerluttulerinermi inatsit naatsorsuutigineqarsinnaanngitsoq
- Maannamut oqaatigisariaqarpara, Pinerluttulerinermi inatsit tunngavigalugu pinerluffigineqarsimasut pisinnaatitaaffii innuttaasulluunniit nalinginnaasumik inatsisitigut innarlitsaalisaanerisa annertusarniarneqarnerat ajornakusoorluinnassasut. Pinerluttulerinermi inatsit naatsorsuutigineqarsinnaanngippat ullutsinnullu naleqqukkunnaarsimappat Naalakkersuisut tamanna tamanut saqummiuttariaqarpaat, siunniuffigalugulu pillaasarnermut inatsit taamaallaat aqqutigalugu innuttaasut inatsisitigut innarlitsaalisaanerat pingaartumik kinguaassiuutitigut innarlerneqarsimanermi qulakkeerneqarlunilu annertusineqarnissaa, Sofia Geisler erseqqissaavoq.
Sofia Geislerp neriuutigaa, Ukiakkut ataatsimiinnermi aalajangiiffigisassatut siunnersuutaata aappassaaneerlugu suliarineqarnerani siunnersuummi siunertaasoq qitiutinneqassasoq.