IA: Kujalliup borgmesterianit nalunaarut uissuumminartoq

Kommune Kujallermi inunnik isumaginninnermut tunngatillugu suliassat pillugit allatut eqqarsarluni sulisoqalertariaqarpoq. Stine Egede (IA) taama isumaqarpoq. Taanna kommunimut qinersinissamut sassassaaq. Tunuarsimaanngilarlu oqassalluni, qinersisartut, partiimilu tatigippanni, kommunimi borgmesteritut inginnissani soqutigissallugu.

- Sooq qinersisoqalermat Inunnik Isumaginnittoqarfik ”soqutiginarseriataartutut ippa", apeqqusiivoq.

- Maannali qinersilernermi saqqummiunneqarmat tupiginngitsuunngilara, tassami ukiunut sisamannguanut pilersaaruteqarsimaneranik takusassaqanngilagut, tusagassiorfinnut nalunaaruteqarluni allappoq.

Qamiteringasuarnerunani pilersaarusiortariaqarpoq

Sermitsiaq.AG-mut itisiliivoq kommunip inunnik isumaginninnermi suliassarpassui pillugit allatut eqqarsarluni sulinissaq pisariaqarlersutut isigalugu.

- Pilersaarusiunngippallaarneq pissutaalluni inunnik isumaginninnerup iluani ilaatigut aningaasaleeqqittoqartariaqartarsimavoq, oqarpoq ukiumullu ikinnerpaamik 5 milliuunit koruuninik aningaasaleeqqittoqartuarsimanera taallugu.

- Tassa imaaliallannerinnarmik aaqqiipallanniarnerinnaasarpoq, siunissarli ungasinnerusoq eqqarsaatigalugu aaqqiissutissanik peqartoqarani. Ataavartussanik pilersaarusiornerit pisariaqarsoraakka, oqarpoq.

Allatulli aaqqiisinnaanermik nammineq isummani maanna saqqummiukkusunngilai, partii tunuliaquttani oqaloqatigeqqaarusukkamiuk.

Kiista: Suliarpassuit aallartereerput

Kommunemi borgmester Kiista P. Isaksenip, inunnik isumaginninnerup iluani assigiinngitsunik unammilligassaqarsimasoq oqaatigaa. Ilaatigut sulisussanik atorfinitsitsiniarneq ajornakusoortarsimavoq. Aammali inunnik isumaginninnerup iluani suliniutit pitsanngoriartitsisut arlallit, ukiuni sisamani kingullerni aallartinneqarsimapput.

- Kommunitta iluani ulloq unnuarlu angerlarsimaffimmik pilersitsivugut, taamaasillutik meeqqat angerlarsimaffiup avataanut inissinneqartut kommuninut allanut nuutsinneqartannginnissaat angullugu. Meeqqat sungiusaminniiginnarsinnaalerput taamaasillutik, borgmesteri oqarpoq.

- Ukiuni sisamani kingullerni anguniagarisimasagut aallaavigalugit sulivugut. Taamatullu missingersuutit ukiumoortut tunuliaqutaralugit ingerlatsilluta. Annertunerusumik pisariaqartitsisoqartillugu aningaasaqarnermut ataatsimiititaliamut kommunalbestyrelsemullu suliat ingerlatinneqartarput. Soorunamilu pisariaqartitsineq aallaavigalugu aningaasaleeqqittoqartarluni, Kiista P. Isaksen oqarpoq ataatsimiititaliamilu suleqataasut tamaasa qutsavigalugit.

Taassuma erseqqissarpaa kommunimut qinersinermi kingullermi 2017-imi partiinik allanik suleqateqarnissamut Siumut mattussisimanngitsoq. Taamaattoq partiit allat suleqataarusugatik tunuartersimasut.

Kissaatinut inissaqarnerulerpoq

Kommune Kujallermi borgmesterip oqaatigaa kommunimut qinersinerup kingulliup kingorna kommunip aningaasaqarniarnera pitsanngortinniarlugu suliniutit arlallit aallartinneqarsimasut. Maannali inuerukkiartorneq unitsinneqarsimalerpoq, illuatungaanullu saatinneqarsimalluni. Sanaartornerit assigiinngitsut aallartissimalerput, soorlu Nanortalimmi Narsamilu utoqqaat illuannik sanaartorneq, inissialiortiterneq meeqqeriviliornerillu. Suliniutillu kommunip aningaasaqarneranik kaaviiaartitsinerulerput.

- Aningaasaqarneq ingerlalluarnerulermat, taava aamma qulatinngilluinnarpara kissaatit annertuut, soorlu kulturhusit aamma multihalit visitorcenterillu, piviusunngortitsinissaat akissaqarfiginerulissagigut, Kiista P. Isaksen oqarpoq.