Skip to main content

IA: Kommuninut akisussaaffiit amerlanerit tunniunneqassapput

Kommunit annertunerusumik akisussaaffeqalissapput qitiusumillu allattoqarfimmit suliassaqarfiit amerlanerusunut kommuninut ingerlateqqinneqassallutik. IA-p qinigaaffiup tulliani suliniutissani tallimanngornermi ualikkut taama saqqummiuppai.

IA-p qineqqusaarneq aallarnerlugu suliniutissaminik tallimanngornermi ualikkut saqqummiivoq.

Kommunini tallimaasuni katillugit 80-it IA tunuliaqutaralugu qinigassanngortipput.

Qineqqusaarnermi qulequtarineqarpoq "Isumassuineq Oqartussaaqataaneq". Siulittaasup Múte B. Egedep ima saqqummiuppaa:

- Innuttaasut oqartussaaqataanerat uterteqqinneqassaaq. Oqartussaaqataassapput, aamma tusaaneqassapput. Najukkani qanimut oqartussaaqataaneq sulissutigissavarput, tamanna ilaatigut kommunit akisussaaffinnik tigusineruneranni, najukkanilu sunniuteqaataasussanik aalajangiinerulerneranni anguneqassaaq, Múte B. Egede saqqummiinermi oqarpoq.

Peqataatitsineq, ilaqutariit nukittuut kuuffeqarfiillu

Qineqqusaarnermi anguniakkat Inatsisartuniuppat kommuniniuppallu, partiip nittartagaanni saqqummiunneqaqqammerput.

Kommunit tamarmik sammisanik pingasunik saqqummiussipput. Kommuneqarfik Sermersuumi borgmesteri, Charlotte Ludvigsen, Kommune Qeqertalimmi borgmesteri Ane Hansen aamma Qeqqata Kommunianiit, Agathe Fontain, Kommune Kujallermit Stine Egede kiisalu Avannaata Kommunianit Bendt B. Kristiansen suliassanik saqqummiisuupput.

Kommuneqarfik Sermersooq:

  1. Nangittumik patajaatsumik ineriartortitsineq
  2. Inissiat amerlanerusut sanaartorneqassapput
  3. Ilaqutariinnut najoruminartuuneq

- Kalaallit Nunaanni illoqarfinni pingaarnersaanerput akuerineqartariaqarpoq. Pisariaqarpoq inissiat nalinginnaasumik attartortittakkat 1850-inik amerlineqarnissaat, pitsaasumik inuuneqarnissamut tunngavissiisussat. Kommunimi illoqarfiit nunaqarfiillu tamarmik immikkuullarissuupput immikkut periarfissallit ineriartortitsinissamullu ilimanaatillit, Charlotte Ludvigsen Kommuneqarfik Sermersuumit oqarpoq.

Kommune Qeqertalik:

  1. Meeqqat inuusuttullu atugaat periarfissaallu qitiutinneqarput
  2. Illoqarfinni nunaqarfinnilu ineriartortitsineq
  3. Kommunimi tamarmi inuussutissarsiutit nutaat

- Allaffissorneq innuttaqqortunitsinnut tulluartoq naqqaniit pilersissimavarput. Maanna nangittumik ineriartorneq pitsaasoq ingerlatissavarput, illoqarfinni nunaqarfinnilu ineriartortitsilluta sanaartornerillu nangillugit, Ane Hansen Kommune Qeqertalimmit oqarpoq.

Qeqqata Kommunia:

  1. Ilinniartitaaneq sunngiffillu
  2. Ilaqutariit nukittuut
  3. Aalisarneq, piniarneq, tunitsiveqarnissat suliffinnillu pilersitsineq

- Meeqqat angerlarsimaffiup avataanut inissinnissaat sapinngisaq tamaat pinngitsoortinneqassaaq. Ajoraluartumik peqartuaannassaaq meeqqanik angerlarsimaffiup avataanut inissinneqartariaqartunik, sullissinerulli nukittorsarneratigut taakku ikilisinneqassapput, pisariaqartitsilluinnartunulli periarfissaqassalluni, Agathe Fontain Qeqqata Kommunianit oqarpoq.

Kommune Kujalleq:

  1. Kuannersuit unitsinneqassaaq - Kuannersuit nittarsaanneqareernerat takornariaqarnermut atussaaq
  2. Inuussutissarsiutinik pioreersunik nutaanillu inerisaaneq
  3. Allaffissornikkut ingerlatsinermi aaqqissuusseqqinneq

- Kuannersuit suliniut nunarsuarmi tusaamaneqalersimavoq. Unitsissaarli, tusaamaneqalersimanerali atorluarlugu sumiiffimmi takornariaqartitsineq aallartisassavarput, Stine Egede Kommune Kujallermi ilaatigut oqarpoq.

Avannaata Kommunia:

  1. Aqutsilluarneq ineriartoqatigiinnerlu
  2. Isumassuinermi sullissinermik aaqqissuusseqqinneq
  3. Avatangiisigut eqqaaveqarnerlu

- Kommunit ataatsimoorlutik eqqagassanik isumaginninnerannut suleqatigiinnermut peqataalersinnaaneq nalilersoqqinneqassaaq. Kommunerput isorartoorujussuuvoq, eqqakkanillu assartuinissamut immikkoortitsinissamullu allaanerulluinnartunik unammilligassaqarpugut. Nunaqarfinni eqqaavissuarnik anartarfeqanermullu ingerlatsinerit takussutissartalimmik iluarsartuunneqassapput, soorlu aamma kuuffeqarneq pillugu pilersaarusiortoqassasoq, Bendt B. Kristiansen Avannaata Kommunianit oqarpoq.

Piumasaqaatit tapillu ataqatigiissapput

IA-mi siulittaasup, Múte B. Egedep erseqqissarpaa kommuninut akisussaaffimmik annertunerusumik tunniussiniarneq aamma kommunit aningaasaqarnerannut naammattumik tunniussinermik malitseqartariaqartoq.

- Assersuutigalugu Inatsisartut inatsisaat inuit innarluutillit tapersersornissaannut tunngasoq kommunit naammassisussanngormassuk naammattunik aningaasaliisoqanngilaq. Kommunit akisussaaffilersussanngilagut nammassinnaanngisaannik, taamaattorli naammaginartumik tapiisassalluta, Sermitsiaq.AG-mut oqarpoq.

- Aamma kommuninut akisussaaffimmik tunniussinerunitsinni kommunit inerisarneqarnerusinnaalissapput, taamatullu inuiaqatigiinni kaagi avinneqartussaq taamatut annertunerulersissinnaallugu, oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER