IA: Kinamit virusip tuniluuttup nunatsinnut pinnginnissaa qulakkeerneqarli
Mimi Karlsenip IA-meersup Kinami virusip tuniluuttup nunanut allanut siaruaassimanera ernummatigaa, Taamaamaammat Kalaallit Nunaanni upalungaarsimasariaqartugut piumasarivaa.
Royal Greenland Kinamit sulisunik tikisitsisarmat, Kinami virusi sarsimut assingusoq Kalaallit Nunaannut anngussinnaavoq.
- Maani Maniitsumi Royal Greenland Kinamit sulisunik tikisitsisarpoq. Taakku paarlakaappata qaqugu Kinamit Maniitsumut suliartortoqassanersoq Royal Greenlandip ilisimatitsissutigisariaqarpaa, ernumanarmallu Kinamiit suliartortitsinissaq unitsikkallartariaqarlugu, Mimi Karlsen tusagassiorfinnut nalunaaruteqarnermini oqarpoq.
Immitsinnut qanilluinnarluta inooqatigippugut
- Illoqarfiit inukitsunnguuvugut, inuit immitsinnut qanilluinnarluta inooqatigiilluta. Kinamiut Maniitsumiittut akuulluarput, suleqatiminnullu qanillutik. Naalakkersuisut, peqqinnissaqarfiullu Kinamiit nunatsinnukartoqarnissaa unitsikkallartariaqarpaat nunaqqatigiit virus-imut illersorniarluta, Mimi oqarpoq.
Nunani allani pisimasutut suliniutit assigiinngitsut aqqutigalugit Naalakkersuisunit eqqissisikkusunneqarpoq.
- Naalakkersuisut sars-simut assingusumik virusimik nunatsinnut eqqussisoqannginnissaanik iliuuserisatik saqqummiullisigit, saqqummiunneqarpata nunaqqatigiit ernumanerput annikillissammat, illuatungiliuttutut politikkeriusoq oqarpoq.