KL

DK

IA: Kim aalisarnermut tunngatillugu suliami akisussaavoq

Jens Immanuelsen aalisarnermut naalakkersuisutut erngerluni tunuartariaqartoq Partii Naleraq isumaqarpoq. Suliami Naalakkersuisut siulittaasuat Kim Kielsen akisussaasuusoq Inuit Ataqatigiit siulittaasuat Múte B. Egede isumaqarpoq.

- Aalisarneq pillugu ingerlatsineq apeqquserneqartussaanngikkaluarpoq, Múte B. Egede oqarpoq.
Jørgen Schultz-Nielsen

- Aalisarneq pillugu ingerlatsineq pitsaanngilaq, maanna tamanna allanngortinniarlugu sulisoqartariaqalerpoq, IA-mi siulittaasoq Múte B. Egede oqarpoq.

Naalakkersuisoqarfik Deloittep aqutsinermik misissuinermit nalunaarusiaa taamatut oqaasertalerpaa.

Politikkikkut akisussaaffimmik tunniussisoqartariaqartoq isumaqarpoq - erngertumik aalisarneq pillugu pitsaanerusumik sulisoqalertariaqartoq ujartorpaa.

- Allamik iliuuseqartoqarsinnaanngilaq maannakkut, naak nalorninaraluartoq kina Nunatsinni aqutsisuunersoq, oqarpoq.

Naalakkersuisut nikerartut

Aalisarnermut naalakkersuisuusartut ukiuni kingullerni arlariiupput. Taamaattumik IA-p Jens Immanuelsenimut toqqaannartumik isornartorsiuinngilaq.

- Aalisarnermut naalakkersuisuusartut nikerarnerujussuat pissutaalluni uunga inissittoqarpoq. Ukiuni kingullerni tassani naalakkersuisuusartut amerlavallaarput. Jens Immanuelsen uani kisimi pisuutinneqarsinnaanngilaq, Nunatsinnimi aqutsisut akisussaatinneqartariaqarput, Múte B. Egede naqissusiivoq.

Pitsaanerusumik ingerlatsinissaq

Nunatsinni inuussutissarsiutini pingaarnerpaaq ajunnginnerpaamik sullinneqartariaqartoq isumaqarpoq.

- Ingerlatsineq apeqquserneqartussaanngikkaluarpoq, ingerlariaqqittoqartariaqalerpoq, politikkikkut patajaatsumik paatsoorneqarsinnaanngitsumillu ingerlatsisoqartariaqalerpoq, IA-mi siulittaasoq oqarpoq.

Læs hele sagen:

aalisarneq piniarnerlu inuussutissarsiutit politikki
Powered by Labrador CMS