IA: Isumaqatigiissut naammanngilaq

Aqqaluaq B. Egedep illuatungeriit ukiunut sisamanut tullernut isumaqatigiinnerat qujamasuutigaa. Akissarsialli qaffaavigineqarnerat annikigalugu.

Sulinerup akilersinnaalernissaanut akissarsianik qaffaaneq naammanngilaq, Aqqaluaq B. Egede isumaqarpoq.

Qaammatini arlalinni akissarsianut isumaqatiginninniartoqareersorlu, SIK aamma Namminersorlutik Oqartussat marlunngornermi unnukkut kiisami isumaqatigiipput. SIK-mi ilaasortaasut agguaqatigiissillugu akunnermut 2,15 koruuninik qaffaavigineqasapput, SIK-p ataani akissarsianut isumaqatigiissuteqartut assigiinngitsut 16-iupput, kattuffillu katillugit 6.757-inik ilaasortaqarpoq.

Aqqaluaq B. Egede (IA) qujamasuppoq illuatungeriit SIK-p ilaasortaasa akissarsiaannut tunngatillugu isumaqatigiissuteqarmata. Isumaqatigiittoqarneranimi ilaasortat pisariaqanngitsumik kalluarneqartariaarupput.

Akissarsianilli qaffaaneq annikippoq, Inuit Ataqatigiit politikkikkut oqaaseqartartuat, Aqqaluaq B. Egede isumaqarpoq.

Akissarsianik qaffaaneq annikippoq. Naalakkersuisut annertunerusumik tunisisariaqaraluarput, pingaartumik nunatsinni inuuniarnerup akisunerujussua eqqarsaatigalugu, Aqqaluaq B. Egede isumaqarpoq. Taassuma erseqqissarpaa SIKp isumaqatiginninniarnermini siullermik 0,92 koruuninik qaffaaniarneq qaangerlugu marloriaataasoq sinnerlugu angusaqarnera ataqqillugu.

SIK-p akissarsianut isumaqatigiissutaa nutaaq ukiunik sisamanik sivisussusilerneqapoq, nalinginnaasumik ukiuni pingasuni atuuttaraluarpoq. Tamanna isumaqarpoq SIK Namminersorlutillu Oqartussat nalinginnaasumit piffissami sivisunerusumi isumaqatiginninniaqqissanngikkallartut.

Namminersorlutik Oqartussat ukiunik arlalinnik takissuseqartumik isumaqatigiissusiorumanerusarput, taamaasillutik tunngavinnik patajaannerusunik pilersitsissagamik. Isumaqatigiissutip takissusaa apeqqutaatillugu Namminersorlutik Oqartussat akunnermut akissarsianik annikinnerutitsisinnaapput.

Tamanna isumaqarpoq SIK-mi ilaasortaasut piffissami sivisunerusumi akissarsiaminnik qaffaavigineqarnissaminnut periarfissaqaqqissanngitsut.

Akit puigornagit

Inuit Ataqatigiit isumaqarput ineqarnerup nioqqutissallu akisunerat Naalakkersuisunit eqqaamaneqartariaqartut. Nunami akit appasitsinneqartariaqarput, akissarsiaanngitsut, Aqqaluaq B. Egede isumaqarpoq.

- Agguaqatigiissillugu akissarsianut qaffaat 2,15 koruuniusoq akileraarnermi ingerlaannaq nungunneqassaaq. Ilaasortat akiligassaannut niuernissaannulluunniit iluaqutaanavianngilaq. Akissarsiat qaffasinnerutinneqartariaqarput sulineq akilersinnaassappat, Aqqaluaq B. Egede Sermitsiaq.AGmut oqarpoq.

Sulinerup akilersinnaanissaa anguneqassappat akissarsiat kisimik isiginiarneqassanngitsut Aqqaluaq B. Egede isumaqarpoq. Taassuma erseqqissarpaa assiliaq ataatsimoortoq Naalakkersuisunit isiginiarneqarnerulertariaqartoq, akit akissarsiallu nalimmassarniarneqarneranni.

- Naalakkersuisut sulisitsisut kattuffiillu suleqatigalugit misissuisariaqarput, ineqarnermut akit nioqqutissallu akii misissuiffigalugit. Aaqqiissoqartariaqarpoq sulisartut ilaasortat aningaasaateqarnerulernissaat anguniarlugu, oqarpoq.

Powered by Labrador CMS