Skip to main content

IA: Issittumi sakkutooqarnerup annertusarneqarnera unitsilli

Nunat Natomi ilaasortaaffeqartut ataatsimiinnissaat sioqqullugu Danmark Issittumi sakkutooqarnikkut annertusaanissaanik aammalu sumiiffimmi sakkutooqarnikkut nakkutilliinerulernissaanik USA-p kaammattuinera, Inuit Ataqatigiinniit iluarineqanngilaq.

- Inuit Ataqatigiit politikkerput imaappoq: Nunarput sakkutooqarnikkut sakkulersornikkullu ineriartortitsivigineqassanngitsoq, nunarput sakkulersorfiunani eqqissinermik tunngaveqarluni nunatut ilisarnaatini attattuassagaa. Sakkulersorluni sorsunnikkut inuit allat inuunerannik ”akiliilluni” suna tamaat sakkugalugu kinaassuserpullu akigalugu pissaaneqarniuttunut peqataassanngitsugut.

- Sinnattoq oqitsuinnaanngilaq, pisariaqavissoruna inuiattut eqqissinermik anersaaqarnitta nunarsuarmioqatitsinnut ataavartumik eqqaasitsissutigiuassallutigu.

Inuit Ataqatigiit politikkikkut oqaaseqartartuat, Aqqaluaq B. Egede tusagassiutinut nalunaaruteqarluni allappoq.

Taama nalunaaruteqarpoq USA Danmark timmisartunik sorsuutinik amerlanerusunik pisinissaanik Issittumilu sakkutooqarnikkut nakkutilliinerunissaanik kaammattuereersorlu.

Danmark ukioq manna siusinnerusukkut aalajangerpoq aningaasartuutit 2023-mi BNP-ip 1,35 procentiinit 1,5 procentiinut qaffanniarlugit. Danskit illersornissamut ministeriat, Trine Bramsen, ilimasaarivoq sillimaniarnermut aningaasartuutit annertuneruleratarsinnaasut.

USA Natomi pingaaruteqarpoq

USA-mi kaammattuinermi eqqaamaneqartariaqarpoq ​​​​​​Natomut nunanullu Natomut ilaasunut USA iligissallugu pingaaruteqarmat.

- Europamiut amerikamiut peqataanngippata allanik ajornannginnerusunik akikinnerusunillu periarfissaqanngillat..

Københavns Universitetiani Center for Militære Studiermi pisortaq Henrik Breitenbauch nutaarsiassaqartitsivimmut Ritzauimut taama oqarpoq.

Nuna sakkuaaffiunngitsoq IA-p kissaatigaa

Danmark amerlanerusunik timmisartunik sorsuuteqarnissaanik nakkutilliinerulernissaanillu USA-mit kaammattorneqaraluartoq, IA-p kissaatigaa Kalaallit Nunaat tassaassasoq “sakkulersorfiunani eqqissinermik tunngaveqarluni nunaassasoq”.

- London-imi ataatsimeersuartussat kajumissaarpagut sakkulersorniarnermut illuatungiullugu issittumi inuuniarnerup oqilisaaffigineqarnissaa sammineroqqullugu, Aqqaluaq B. Egede allappoq.

Natomi ilaasortat 2014-imi ataatsimeersuarneranni USA piumasaqarpoq nunat peqataasut BNP-mik 2 procentii illersornissamut aningaasaqarnermut atorneqartalissasut.​​​​​​​

Nunat Natomi ilaasortat Londonimi decemberip pingajuani sisamaanilu ataatsimeersuassapput.  

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER