IA: Inuunerissaarneq siuarsaaffigineqassaaq

Kangaatsiaq politeeqarfeqalissaaq Qeqertalimmilu meeqqanut atuarfigissaasoqassaaq innuttaasunullu inissiagissaasoqarluni. Kommune Qeqertalimmi Inuit Ataqatigiit politikkikkut anguniagaasa tulleriaarneqarnerini sulissutigissallugit pingaarnersiukkat ilaat taakkuupput

Taava tassa maanna pissutissalimmik oqartoqarluarsinnaanngorpoq kommunalbestyrelsenut nunaqarfinnilu aqutsisunut qinersinissamut, 5. april 2021-mi pisussamut Kommune Qeqertalimmi qineqqusaarnerit aallartisinneqartut partiimit Inuit Ataqatigiinnit, Sermitsiaq allappoq.

Niaqornaarsummi Inuit Ataqatigiit aaqqissuisoralugit, IA-p Kommune Qeqertalimmi immikkoortortaqarfii, borgmester Ane Hansen aamma partiip siulittaasua Múte Bourup Egede peqatigalugit aasaanerani isumasioqatigiipput arfininngornermi 1. august, tassanilu politikkikkut sulissutigisat tulleriaarneqarneri ilaatigut kingumut nalilersorneqarput.

Partiip Niaqornaarsummi immikkoortortaqarfiani siulittaasoq aammalu partii sinnerlugu nunaqarfinni aqutsisuni kommunalbestyrelsemilu ilaasortaq Thomas Petersen ataatsimiinnertik naammagisimaarluarpaa aammalu anguniakkat nalilersorneqaqqereerlutik siunnerfiliunneqartut isumalluarfigai:

- Kommunip aaqqissuussaaneranut tunngatillugu tamatta, qinikkatut aammalumi kommunimi sulisutut aaqqissuussaaneq sungiunniaqqaarnikuuarput, tassami kommunitta aaqqissuussaanera kommunit aqunneqartarnerinut nalinginnaasunut sanilliunneqarsinnaannginnami, maannalu misigisimavunga piareersimallualersimalluta politikkikkut anguniakkatta sulissutigineqarnerisa nanginnissaannut, uangalu nammineq assut nuannaarutigivara innuttaasut atugarissaarnissaannut tunngavissat annertuumik ukkatarisussanngoratsigit, pingaartumik utoqqartatta, meerartatta inuusuttortattalu atukkamikkut periarfissamikkullu pitsanngorsaaffigineqarnissaat eqqarsaatigalugu.

- Anguniakkat ilaat nunaqarfinni aqutsisut aammalu kommunalbestyrelsi aqqutigalugit isumagisinnaavagut, anguniakkalli allat aamma Inatsisartut folketingilu aqqutigalugit aamma suliassaallutik, taamaammaat aamma assut iluarisimaarpara siulittaasutta Mútep peqatigissalluta periarfissaqarlunilu piffissaqarmat, Niaqornaarsummi IA-p siulittaasua, Thomas Petersen Sermitsiamut oqarpoq.

Allaaserineqartoq avisiimi Sermitsiami tamakkiisumik atuaruk. Aviisi uani pisiarineqarsinnaavoq:

Powered by Labrador CMS