IA: Inatsisartut peqataatinnagit Kimip atsiornera ajornartorsiutaavoq

Isumaqatigiissut Lars Løkke Rasmussenimit Kim Kielsenimiillu atsiorneqartoq qanoq isumaqarfiginerlugu Sara Olsvig suli oqaaseqarusunngilaq

Mittarfiliornissanut atatillugu 700 million koruuninik aningaasaliineq kiisalu 900 million koruuninik aningaasanik attartorneq. Isumaqatigiissut Kalaallit Nunaannut pitsaasutut isikkoqarsinnaavoq.

Isumaqatigiissut qanoq isumaqarfiginerlugu Sara Olsvig oqaaseqarumanngikkallarpoq.

- Isumaqatigiissut suli takunngilarput, taamaattumik piumasaqaataasut aamma suli ilisimanngilagut, Sara Olsvig Sermitsiaq.AG-mut oqarpoq.

Kim Kielsen isumasioqatiginiarlugu Inatsisartuni Aningaasaqarnermut Akileraartarnermullu Ataatsimiititaliap qaaqqugaluarpaa ullumi. Kisianni Kim Kielsen takkutinngilaq.

- Tamanna ajornartorsiutaavoq, tassami Inatsisartut avaqqullugit isumaqatigiissummik atsiorpoq, Sara Olsvig isornartorsiuivoq.

- Kikkut tunuliaqutaralugit atsiorpa, tassami Naalakkersuisooqatigiit amerlanerussuteqarunnaarput, oqarpoq.

Inatsisartut isumaqatigiissummik akuerinnereerunik aatsaat atuutilissasoq Kim Kielsenip tusagassiortunik katersortitsinermi ilisimatitsissutigaa.

Partiip Naleqqap Naalakkersuisooqataajunnaarnera pissutaalluni Siumut isumaqatigiissummut tapersiisussanik ujaasisariaqassaaq, tassani Demokraatit aamma Inuit Ataqatigiit periarfissaapput.

Kisianni suli partiinit isummerfigineqanngilaq suli, IA-p paaseqqaarusuppaa sumik imaqarnersoq. Demokraatit siulittaasuata Niels Thomsenip aamma isumaqatigiissut takoqqaartinnagu isummerfigerusunngilaa.

Powered by Labrador CMS