IA: Imaatigut sillimaniarneq ajunngila?

Stine Egedep kissaatigaa Kalaallit Nunaata sineriaa tamakkerlugu imaatigut sillimaniarnerup pitsaasuunissaa.

Taamaannat imaatigut sillimaniarneq pillugu apeqqutinik arlalinnik Naalakkersuisunut nassiussivoq.

- Kalaallit Nunaata kujataata, kangiatalu sineriaata imartaani umiarsuarujussuaq anorersuartumi ajunaalerluni kalerrisaarissagaluarpat annaasiniarneq qanoq ingerlanneqassaneva?Stine Egede paragraf 37 atorlugu apeqquteqarpoq.

Apeqquteqaatiminut tunngavilersuutigaa umiarsuit anginerit mikinerusullu arlaqartut Nunatsinnut tikittalersimanerat. Umiarsuillu tikittartut saniatigut ilaatigut Kujataani anorersuarujussuartarnera ukiuni kingullerni sakkortunerulersimasoq tunngavilersuutigalugu.

- Anorersuartumi Nunatta Kangiata sineriaatigoortilluni imaluunniit Nunatta isuata kujataatigoortilluni motoorimik ajutoornerup kinguneranik ajornartorsiulertillugu annaasiniartoqariataassagaluarpat Nunarput qanoq piareersimatiginersoq imaatigut silaannakkulluunniit annaasiniarnissamut, tunngavilersuutimini allappoq.

Qanoq iliussaagut?

Stine Egedep paaserusuppaa sakkutuut umiarsuaat Nuummitsillugu imaluunniit avannarpasinnermiitsillugu, umiarsuaq Nunatta kangianiitsilluni imaani ajornartooraluarpat, annaassiniarnissaq qanoq ingerlanneqassanersoq.

Taassuma ilisimatitsissutigaa umiarsuaq 1000-t sinnerlugit ilaasoqartoq Norgep imartaaniitilluni anorersuartumi motoriminik ajornartorsiulernini peqqutigalugu ajornartoornera nutaarsiassatigut malinnaavigisimallugu.

Taassuma paaserusuppaa qulimiguullit imaatigut annaassiniarnermut atortuuteqartut qassit Kujataaniitinneqarnersut, qassillu nunatsinni pigineqarnersut.

- Annaasiniarneq ullut arlerlugit ingerlassappat, pilotit naammattut ningitsissutilerisinnaasut nunatsinni pigineqarpat? Aperivoq.

Ilanngullugu paaserusuppaa imartani taaneqartuni annaassiniartoqareersimanersoq imaluunniit annaassiniarnissamut sungiusartoqareersimanersoq.