IA: Efterskolemit nalunaarusiap takutippaa siusissukkut iliuuseqatoqarnissaanik pisariaqartitsisoqartoq
Nalunaarusiatigut takuneqarsinnaavoq, kalaallit efterskoleni atuartut arlallit atuarnerminnik unitsitsiinnartartut. IA-mit Ilaqutariinnermut Peqqissutsimullu Ataatsimiititaliami ilaasortat isumaqarput, meeqqat atuarfianni meeqqat atuarlertinnagit iliuuseqartarneq aallartinneqareertalertariaqartoq
Ilaqutariinnermut Peqqissutsimullu Ataatsimiititalimi IA-mit ilaasortaatitat Stine Egede, Aqqa Samuelsen aamma Mikivsuk Thomassen, meeqqanut inuusuttunullu tunngasutigut nuna tamakkerlugu iliuusissatut pilersaarusiortoqarnissaanik piumasaqarput.
Peqatigiiffik Kalaallit Meerartaasa Ilinniartitaanermullu Aqutsisoqarfiup peqatigiillutik nalunaarusiaata takutimmagu kalaallit efterskoleni atuartut suli piffissaatinnagu atuarnerminnik unitsitsisartut 17 procentiusut piumasaqartoqarpoq.
- Efterskolertartut taamaatitsiinnartarnerinut patsisaasunik misissuisitsinermi nalunaarusiap pingaaruteqarluinnartup uppernarsarpaa siusissukkut iliuuseqartarnissap qanoq pingaaruteqartiginera, ilaasortat pingasut taakku tusagassiorfinnut ataatsimut nalunaaruteqarnerminni oqarput.
- Iliuuseqarneq atualernissaq sioqqullugu aallartereertariaqarpoq, tamannalu nuna tamakkerlugu pilersaarusiornermik tunngaveqassalluni .
Nalunaarusiatigut takutinneqarpoq, inuusuttut atuarnerminnik unitsitsiinnartarnerannut pissutaanerpaasartut tassaasut anisitaaneq imaluuunniit atugarliorneq/inerissimannginneq, tulliullutik pissutaasartut tarnikkut ajornartorsiuteqarneq angerlarsernerluunniit. IA isumaqarpoq, nalunaarusiami kisitsisit takutinneqartut ajornartorsiutinut tunngaviulluinnartut.
- Nalunaarusiap aammaarluni takutippaa nuna tamakkerlugu pilersaarusiornerup qanoq pisariaqartiginera, aammalu siusinaarluni iliuuseqarnissap qanoq pingaaruteqartiginera. Inuit Ataqatigiit ukiorpaalunni Inatsisartutigoortumik anguniagaasa ilagivaat nuna tamakkerlugu pilersaarusiornissaq. Taanna aqqutigalugu iliuuseqarfigisassat saanneqarsinnaalertussaapput, meeqqat taakkulu qaninnerpaassaaq akuutillugit. Meeraq qitiutillugu ukkatarineqassaaq, oqartussaqarfiit assigiinngitsut akornanni arsatut akortaqattaagassatut inissinnagu .
- Nalunaarusiap eqqarsartinngitsuunngilaatigut meeqqat angerlarsimaffitsik qimallugu illoqarfinni atuartut angerlarsimaffianniittariaqartut atugarisaasa misissuiffigineqartariaqarluinnarnerannik. Isumaqarluinnarpugut meeqqat atuarfiini atuarnissaq pissutigalugu skolehjemmini / elevhjemmini najugaqartut misissuiffigineqarnissaat aamma pisariarialerujussuusoq .
nal. 10.25 iluarsineqartoq. IA-mi ilaasortat pingasut ataatsimoorlutik oqaaseqartuupput