IA: Demokraatit pissaaneqarniarnerat akaarnaatsuuvoq
Demokraatit sisamanngornermi borgmesterimut Asii Chemnitz Narupimut aamma IA-mut tatiginnikkunnaarsimallutik nalunaarutiginninnerisa kingorna, Kommuneqarfik Sermersuumi IA-mit sakkortuumik isornartorsiorneqarput.
IA-mi kommunimi politikerip Inge Olsvig Brandtip illoqarfiit pingaarnersaata kommunianeersup Demokraatit alloriarnerat kingulleq apeqquserpaa, tassani ukiuni qulini borgmesterimik aamma IA-mik suleqateqarneq taamaatinniarlugu nalunaarutiginnipput.
- Politikkikkut iliuuseqannginneq borgmesterimik Inuit Ataqatigiinnillu suleqateqarunnaarnermi patsissiunneqarpoq (Demokraatinit, aaqq.), tusagassiutitigulli nalunaarummi namminneq aaqqiissutissamissut periarfissanik saqqummiinngillat, Inge Olsvig Brandt, tusagassiuutinut nalunaarummi, tallimanngornermi ullaap tungaani nassiussamini taama allappoq.
Politikkikkut piginnaasaqannginneq
Demokraatit taamatut alloriarnerat ’’politikkikkut piginnaasaqannginnermik takutitsinerusoq’’ taassuma oqaaatigaa, Tunumi meeqqat sumiginnakkanut tunngatillugu aaqqiissutissanik siunnersuutinik saqqummiussinnginnerat pissutigalugu.
- Tasiilami inuttut ajornartorsiutit taamak annertutigitillugit peqatigiit ataatsimoortumik iliuuseqarnissaat aaqqiissuteqarnissaallu pissusissamisoortuuvoq, kommunimi politikeri taama naqissusiivoq.
- Suleqatigiinnerni tamani tatigeqatigiinneq toqqammaviusarpoq. Suleqatigisat tatiginngikkaanni aaqqiinissaq siunertaralugu saaffigisariaqarput. Soorluuna Demokraatit naalakkersuinikkut ingerlatseqataanerminni imminnut qiviartariaqartut. Ataatsimoornissami aaqqiagiinngissutit aaqqinniarnissaannut politikkikkut sapiissuseqarnissaq pisariaqarpoq, nammineq soqutigisat kisiisa ukkannagit ataatsimoornikkut aaqqissutissanik angusaqartoqarsinnaaneruvoq, IA-mi politikeri taama oqarpoq.
Suliassat aallunneqarlik
Demokraatit suliassanik aallartitsillutik meeqqat pillugit aaqqiissuteqaqataanissaannut taanna kajumissaarivoq.
Borgmesterip Asii Chemnitz Narupip oqaaseqartinnissaa Sermitsiaq.AG-p maannamut suli iluatsinngilaa.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...