IA: Demokraatit akisussaaffimmik tigusisariaqalerput
Inuit Ataqatigiit siulittaasuata tulliata, Aqqaluaq B. Egedep Demokraatit Naalakkersuisoqataajumannginnerat paasiuminaatsippaa
- Demokraaatit suleqataanermik akisussaaffimmillu tigusisiniarlik.
Aqqaluaq B. Egede (IA) tusagassiutinut nalunaarummini taama allappoq.
Aqqaluaq: Akisussaaffimmik tigusiniaritsi
Taassuma paasiuminaatsippaa partii sooq naalakkersuisoqatigiinni ilaajumannginnersoq.
- Demokraatit periarfissaqarsimapput Naalakkersuisoqarfinnik tigusillutik sulianik ilusilersueqataanissaminnut. Akisussaaffik annertooq qunugisutut illugu patsisilersuutigaat Siumup ilumini ilungersunartorsiornera pissutigalugu Naalakkersuisooqataarusunnatik, IA-p siulittaasuata tullia tikkuaavoq.
- Nunatsinni inuiaqatigiittut arlagut unamminartumi inissisimappata akisussaaffimmik tamatta tigusisariaqarpugut pingaartumik nunatta aqunneqarnera pineqartillugu. Aamma tamanna Demokraatinut isornartorsiuiinnartunut atuuttariaqarpoq pisussaaffittut isigineqartariaqarpoq. Ajornartorsiortoqarsorigaanni qimarratiginniinnarneq nukittoqqutissarinngilarput, Aqqaluaq B. Egede oqarpoq.
Suleqataarusussuseq ujartorpaa
“Naalakkersueriaaseq nukittooq” anguneqassappat allannguisoqartariaqartoq, taanna isumaqarpoq.
- Inuit Ataqatigiit sinnerlugit kaammattuutigerusuppara suleqatigiinneq pilersinneqartoq tanngassimaarutigisutut nilliaatigiinnarnagu suliassaqarfinnik akisussaaffinnik tigusisinnaassuseqarnissaq pingaarnerpaajusoq.
- Naalagaanniallaqqinneqqusaanneq suleqateqallaqqinneqqusaannermik taarsersiuk. Suleqatigiinneq tamatsinni nukittunerulersitsigu. Akisussaaffiit tigusarlugit suliassaqarfiit ornillugit sunniuteqarfigalugillu sulisariaqarpugut, Aqqaluaq B. Egede allappoq.