IA: Coronavirus pillugu kalaallisut paasissutissat amigaatigaavut
Sofia Geisler (IA) coronavirus pillugu kalaallisut paasissutissanik ujartuivoq, innuttaasut kalaallisuinnaq oqaasillit qanoq iliuuseqassanerlutik pitsaanerusumik paasissutissineqarniassammata
- Ajorpoq. Akuersaarneqarsinnaanngilaq. Innuttaasut inuit attaveqaqatigiittarfiisigut paasissutissarpassuarnik (eqqunngitsunik) pisssarsiniartarnerat pisariaqanngitsumik qulalersitsillunilu toqqissisimajunnaartitsisarpoq, Sofia Geisler tusagassiorfinnut nalunaaruteqarnermi allappoq.
Nappaalanersuaqarneranut Ataatsimiititaliaq tusagassiorfinnut nalunaarutinik qallunaatuinnaq allaqqasunik arlaleriarluni nassiussisimavoq.
- Nappaalanersuaqarneranut Ataatsimiititaliaq tusagassiorfinnut nalunaarutinik saqqummiussisaqattaarpoq. Nappaalanersuaqarneranut Ataatsimiititaliami atorfilittat suliassaminnik suliarinnpput. Nunamili maani oqaatsit atorneqarnerpaat atorlugit paasissutissiisarfik amigaataavoq, Sofia Geisler oqarpoq.
Nittartagarnissamik ujartuisoq
Assersuutigalugu siunnersuutigivaa, Naalakkersuisut nittartakkamik, coronavirusimut tunngatillugu suliniutik immikkut saqqummiiffiusartussamik oqaatsillu marluk atorlugit nutarterneqartartussami Naalakkersusut pilersitsisinnaasut.
Sofia Geislerip aamma apeqqutigaa, Naalakkersuisut tusagassiortullu tamarmiusut, nunami maani tunillatsisimasut siulliit paasineqarpata qanoq attaveqaqatigiittoqartarnissaanut pilersaaruteqarnersut.
- Peruluttoqarnera pillugu oqaloqatigiittarneq innuttaasunut eqqissisitsillunilu toqqissisimatitsisusaavoq, nunamilu maanni tunillatsisimasoq siulleq paasineqarpat pisortat pisumik isumaginnissinnaanerannik innuttaasut isumaqartilerlugit, Sofia Geisler erseqqissaavoq.
Chefpolitiinspektørip Svend Foldagerip Sermitsiaq.AG-mut ilisimatitsissutigaa, Nappaalanersuaqarneranut Ataatsimiititaliaq ullumi sisamanngornermi kingusinnerusukkut ataatsimiileruni isornartorsiutigineqartumut isummerumaartoq, taamaalereerunilu aatsaat akissuteqarluni.