isornartorsiorneq
IA: Vittus Qujaukitsoq Pituffik pillugu suliami kukkuvoq
Nunanut allanut tunngasunut naalakkersuisuusimasup Vittus Qujaukitsup nunanut allanut tunngasunut periarfissani annaavai, tamannalu Naalakkersuisuni inissisimaffimminik annaasaqassutigaa, IA-p nunanut allanut tunngasunut oqaaseqartartua oqarpoq.
- Vittus Qujaukitsoq Pituffik pillugu suliami aaqqiinissamut periarfissatsialaqaraluarpoq. Taamaaliortoqanngilarli.
Inuit Ataqatigiit nunanut allanut tunngasunut oqaaseqartartua Ane Hansen tusagassiuutinut nalunaarummi taama allappoq. Vittus Qujaukitsup maanna Naalakkersuisunut ilaasortaajunnaarneranut pissutaasut ilagigaat, taanna oqarpoq.
Vittus Qujaukitsup Pituffimmi kiffartuussinermut isumaqatigiissutip annaaneqartoq, Aleqa Hammondimit kingornussani aaqqiivigisimasariaqaraluaraa, Ane Hansen isumaqarpoq.
- Sulianut Kalaallit Nunaannut – EU-p avataaniittumut – tunngatillugu Qallunaat Nunaata EU-mi malittarisassanik malinninniavissornera sulialli aallartinnerani apeqqusersorparput.
Atuaruk: Vittus Qujaukitsoq: Naalakkersuisunit tunuarpunga
IA: Vittup naalakkersuisuunerani susoqanngitsoq
- Apeqqullimi taamaattoq qallunaat naalagaaffiata eqqartuussissuserisuata aamma qaqilerpaa, tamannalu Vittus Qujaukitsup Aleqa Hammondillu 2014-illi ukiaani ilisimalereersimassavaat. Taamaammat 2015-imi Inuit Ataqatigiit Inatsisartuni apeqquteqaat aallaavigalugu oqallitsitsinermut saqqummiussaqarput, tassanilu inatsisartut ataatsimoorlutik oqaaseqaateqarnissaat siunnersuutigaarput.
- Inatsisartut oqaaseqaataat partiinit tamanit taperserneqarpoq, tassanilu illersornissamik isumaqatigiissutip isumaqatiginninniutigeqqinneqarnissaa siunertaralugu Naalakkersuisut illersornissamik isumaqatigiissummik misissueqqissaarnissaannik piumaffigineqarput, Ane Hansen erseqqissaavoq.
Atuaruk: Vittup Danmark USA-lu sioorasaarpai
Makitaniarsimasoq
Taanna naapertorlugu USA-mi præsidentit nikinnginneranni Vittus Qujaukitsoq ilungersuuteqarsimasariaqaraluarpoq.
- Kisianni iluatsisimaarneq qatangiinnartinneqarpoq. Aatsaat 2016-ip ukiaani, Inatsisartut ataatsimoorlutik oqaaseqaateqarnerannit ukioq ataaseq sinnerlugu qaangiutereersoq, illersornissamut isumaqatigiissutip isumaqatiginninniutigeqqissinnaaneranut oqariartuummik imaqartumik Qujaukitsoq siunnersuuteqarpoq, taanna oqarpoq.
Inuit Ataqatigiinniillu aamma Vittus Qujaukitsumut isornartorsiortoqaqqippoq:
- Vittus Qujaukitsoq isumatusaartumik oqaloqatiginnissinnaanermut piginnaaneqanngilaq. Naalakkersuisuni tunuliaquttaminik ataqatigiissaarisannginneratulli Naalakkersuisut siulittaasuata Qujaukitsup nunanut allanut tunngasunut akisussaaffimmik arsaarnissaa pillugu aalajangernera paasilluarsinnaatigaara.
Atuaruk: D: Naalakkersuisut nukillaajallaqqapput
Toqqisisimatitsiniaritsi
Naalakkersuisut siulittaasuat Kim Kielsen qinigaaffiup sinnerani toqqisssisimatitsinissaanik Inuit Ataqatigiit taamaammat piumasaqarsimapput.
- Nikititerinerit kingullermisut pisut iluamik aqutsisoqarneratigut eqqissisimanerulernermik kinguneqassapput. Nunatta nunarsuarmi eqqissinissamik siunertalimmik anguniagaqarnini naqissusertuarliuk aamma nunarsuarmioqatitsinnut kiinnernermi tamani, Ane Hansen oqarpoq.
Atuaruk: Karl-Kristian Kruse naalakkersuisunngoqqittoq