urandebat
IA Ungdom: Demokraatit oqartussaaqataaneq tapersersorpaat?
Innuttaasunit tapersersorneqarani uranimut akuersaannginneq Demokraatit atorunnaarsinniarpaat? Taamatut Inuusuttut Ataqatigiit Demokraatinut apeqquteqarput
Inuit Ataqatigiit inuusuttaat isumaqarput innuttaasut toqqaannartumik aperineqassasut aatsitassarsiornermi uranip saniatigut tunisassiatut akuersaarneqannginnerata atorunnaarsinneqarnissaani. Taakkua naammaginngilaat akuersaannginnerup atorunnaarsinneqarnissaa ukiakkut ataatsimiinnermi, tallimanngorpat aallartittussami, Demokraatit tapersersorniarmassuk.
Atuaruk: Randi Broberg: Urani pillugu innuttaasut taasitinneqarlik
– Demokraatit isumaqarpat uranimut akuersaannginnerup atorunnaarsinneqarnissaanut periuseq eqqortoq atorneqartoq?
Taamatut Demokraatinut apeqquteqarput Inuit Ataqatigiit inuusuttunut immikkoortoqarfiat Inuusuttut Ataqatigiit.
Inuusuttut Ataqatigiit kissaatigaat uranimut akuersaannginnerup atorunnaarsinneqarnissaanik aalajangiinermi innuttaasut peqataatinneqartariaqartut.
Atuaruk: Naalakkersuisut urani pillugu: Qinersisartut oqaaseqareerput
– Inuusuttut Ataqatigiit isumaqarpug paasisitsiniaasoqassasoq tamatumalu kingorna tusarniaasoqarluni, aatsaallu tamatuma kingorna aalajangiivittoqarluni. Qularutissaanngilarmi Namminersorlutik Oqartussat nuna tamakkerlugu paasisitsiniaasimanngimmata, tamatumani innuttaasut ataasiakkaat itinerusumik paasitinneqassallutik uranimik piianerup kinguneqaataanik, Inuusuttut Ataqatigiit siulittaasuata tullia Jane Petersen oqarpoq.
– Taamaattumik tusarusupparput Demokraatit oqartussaaqataanermi tunngaviit tunulliullugit, innuttaasut sunniuteqartinnagit, uranimut akuersaannginnerup atorunnaarsinnissaanut akuersilluni taasissanersut.