IA tunngaviusumik inatsisissamut missingiut pillugu: Suleqatigiiffik innuttaasut peqataatinneqarnerannik qulakkeerinnissaaq

Inatsit tunngaviusussaq pillugu missingiut, namminiilivinnissamut qanilliallalluni alloriarfiusoq IA-p nuannaarutigaa. Kalaallit Nunaata namminiilivinnissaanut inatsimmut tunngaviusussatut missingiut, ukiut arfineq-aappaat avillugu suliarineqartoq, 30 millionit koruuninik akeqarpoq.

Kisianni suliami ingerlaqqinniarluni aningaasat suli amerlanerusut atoqqinneqarsinnaassasut ilimanarsinnaavoq.

Tassami IA-mi politikkikkut oqaaseqartartoq, Agathe Fontain, suleqatigiiffimmik immikkut ittumik maanna tusagassiuutinut nalunaarummi partii sinnerlugu inatsimmik tunngaviusussamik suliaqartussamik Naalakkersuisut Inatsisartullu akornanni ataqatigiissaarisussamik attaveqaataasussamillu pilersitsisoqassasoq siunnersuuteqarpoq.

- Tamat oqartussaaqataanerat qitiutillugu namminiilivinnisamut sinaakkutit suliarineranni ataatsimoorussamik akisussaaffeqarlutalu suliassaqarpugut, taamaaliussaguttalu innuttaasut peqatigisariaqarpagut, Agathe Fontain isumaqarpoq.

Suliami alloriarneq tulliuttoq

Inatsit tunngaviusussaq pillugu missingiutip piaartumik innuttaasunut atuagassiarineqarluni kiisalu isiginnaarutikkut inoqatinullu attaveqaatitigut takuneqarsinnaasumik qaammarsaatigineqassasoq, taanna isumaqarpoq. Apeqqutit taakku innuttaasunit amerlanngitsuinnarnit akineqaratik innuttaasut tamaasa peqataatillugit akineqarnissaat pisariaqartoq, IA isumaqarpoq.

Tunngaviusumik isummerfissat assersuutigalugu innuttaassuseqarneq, tamat oqartussaaqataanerat pillugu tunngaviusumik isummerfissat aammalu pissaanerup pingasoqiusamik agguagaaneranut tunngasut isummerfissaapput. Apeqqutit taakku, Agathe Fontainip oqarnera naapertorlugu, innuttaasunit amerlanngitsuinnarnit akineqaratik innuttaasut tamaasa peqataatillugit akineqarnissaat pisariaqarpoq.

Aammattaaq Inatsisartutigut Naalakkersuisutigullu suliaq unigani ataqatigiissarluarneqarlunilu ingerlanneqartariaqartoq, suliassarmi annertummat, ataqatigiissakkamik peqqissaartumillu suliarineqartariaqartoq, IA isumaqarpoq.

Sermitsiaq.AG Agathe Fontainip aamma IA-p suleqatigiiffimmik immikkut ittumik pilersitsisoqarnissaanik siunnersuuteqarnerat pillugu annerusumik oqaaseqartitsiniarluni sulissuteqarpoq.