IA tujorminartupilussuarmik nassaartoqarsimanera pillugu: Kanngunarluinnartoq akuersaarneqarsinnaanngitsoq.

Canadami Kamloops Indian Residential School-ip eqqaani meeqqat 215-it saarngi kingullermik sisamanngormat nassaarineqarput.

Meeqqat ilaat pingasunik ukioqarput, nassaarnerlu Canadami tupatsitsisimaqaaq.

Nunatsinni naalakkersuisooqatigiinni partiimit, Inuit Ataqatigiit, meeqqat pineqarsimanerat 'kanngunarluinnartoq akuersaarneqarsinnaanngitsoq' oqaatigineqarpoq:

- Canadami nunanilu allani nunasiaateqarsimasut, nunat inoqqaavisa meerartaannut
amiilaarnaqisumik pissusilersortarsimanerat, oqaluttuarisaanermi kanngunarluinnartoq
akuerinngilarput, Inuit Ataqatigiit Inatsisartuisa siulittaasuat Agathe Fontain tusagassiorfinnut nalunaaruteqarluni allappoq.

Meeqqat ataqqineqarlutillu ilineqassasut

Inuit Ataqatigiinnit oqaatigineqarpoq, nunat tamat/naalagaaffiit paasisaq pillugu, pisimasup
akuerineqarsinnaannginneranik naqissusiillutik nalunaaruteqarnissaat neriuutigalugu.

- Meeqqat inuttulli allatut ataqqinartumik pissusissamisoortumillu pineqarlutik qanortoq
ilineqarilik. Alianarluinnartumik pisoq, nunarsuup oqaluttuarisaanerani paasisimalikkatsinnut ilaalerpoq, puigunngisaannagassaq, gruppimi siulittaasoq Canadami Inuit, First Nations og Mètis-imut misiginneqataanerminnik oqariartuuteqartoq allappoq.

Canadami naalakkersuisut erseqqissumik tamatuminnga nassuiaateqartariaqalerput, taamatut oqarpoq Perry Bellegarde, Candami nunat inoqqaavisa ilaat sinnerlugit Assembly of First Nations-imi aqutsisuusoq.

- Atuarfinni takkunani aniguisimasut ukiorpassuarni tamakku oqaluttuarisarpaat, ilerrilli taakku ilumoornersut, meeqqat tammavittarnerat meeqqallut toqungasut timaannik matooriinnaasarsimaneq upperineqartarsimanngillat, Bellegarde Canadami tusagassiorfimmut CBC-mut oqarsimavoq.

- Aniguisimasut oqaluttuarisartagaat kialluunniit upperisimangilaa.

Kulturertik alassagaat

Taanna tusagassiorfik The Globe and Mail naapertorlugu oqarsimavoq, "aniguisimasut ilaqutaasalu ilumoortoq ilisimasaqariaqaraat".

Inuit Tk'emlúps te SecweÌpemc-imeersut sisamanngormat ilisimatitsissuteqarput, Kamloops Indian Residential School-ip, taamanikkut Canadami atuarfiit annersaata eqqaani meeqqat timaannik nassaartoqarsimasoq.

Atuarfik Canadami immikkut aqqissuussaasumik ingerlatsinermut ilaatinneqarpoq, Candami nunat inoqqaavisa meerartaasa kulturiminnik tunutsillutik kitaamiut kulturiannik atuisalernissaat anguniarlugu kostskolernissamut allatsiffigisarfiat, nutaarsiassaqartitsivik Reuters allappoq.

Atuarfiit pinngitsaaliissumik meeqqanik angajoqqaaviniit arsaarinnittarnermi atorneqartarsimasut, ukiuni 1831-imiit 1996-imut atuussimapput.

Misissuissatut kommissioniliami ilaasortaasut 2015-imi misissuinermini paasisimavaat, innarliisoqartarsimasoq, peqqinnanngitsunik nerisitsisoqartarsimasoq pinngitsaaliillunilu atoqatiginnittoqartarsimasoq, Reutersilu naapertorlugu aaqqissuussaq "kulturikkut toqoraanermik" taasimavaat.

Pisortatigoortumik naatsorsuusiorsimanerit takutippaat atuarfimmi taamaallaat 50-inik toqusoqarsimasoq.

Kommissionimit paasineqarsimavoq, meeqqat ikinnerpaamik 4100-t atuarfinni innarlerneqartarsimanertik paarinerlunneqartarsimanertillu toqqutigisimagaat. Kisitsisit suli eqqornerusut amerlanerujussuunissaat ilimagineqarpoq.

CBC naapertorlugu, Canadami atuarfiit taamatut ittut ikinnerpaamik 130-upput, nunallu inoqqaavisa meerartaat 150.000-it missaanniitut atuarfimmi taamatut ittumi atualernissamut ukiorpassuit ingerlaneranni allatsittarsimapput.

Kamloops Indian Residential School-imi meeqqat 500-t angullugit atuartoqarsinnaasimavoq.

Nutaarsiassaqartitsivik AFP naapertorlugu, atuarfimmi toqusimasut taamaallaat 50-iusutut pisortatigoortumik nalunaarsugaavoq.

Premierministerip Justin Trudeau-p oqaatigisimavaa "ilumoortoq ilisimassallugu pingaaruteqarmat" atuarfiit eqqaanni assaasoqassasoq.