mittarfiit
IA: Tasiilami mittarfik sananeqarumaartoq
Inuit Ataqatigiit, Justus Hansenip (D) siunnersuutaanut itigartitsisimapput, partiimmi Tasiilamit Tasiilamullu angallannerup akisuallaaleratarsinnaanera ernummatigisimavaa. Taamaattoq Tasiilami mittarfiliortoqassasoq, IA-minngaanneersoq Bendt B. Kristiansen oqarpoq.
- Justus Hansenip (D) siunnersuutaa itigartipparput, atuisut akilersuisussanngoqqunagit, suliallu sukkanerusumik aallartisarsinnaanissaa pingaartikkatsigu.
Inuit Ataqatigiinneersoq Bendt B. Kristiansen tusagassiuutinut nalunaarummini taama allappoq.
Justus Hansenip siunnertuutigisimavaa, Tasiilami suliassaq Kalaallit Airportsip ataanut ilanngunneqarnissaa, taakku Qaqortumi nutaamik mittarfiliortussaapput aamma Nuummi Ilulissanilu mittarfinnik talliliisussaallutik.
Pilersaarusiaq kinguarsarusunneqanngitsoq
IA Tasiilami mittarfiliornissamut akerliunngitsoq, Bendt B. Kristiansenip uparuarpaa.
- Tasiilami mittarfik Kalaallit Airport-imut ilanngunniassagaluarpat ernumanartipparput Tasiilamit Tasiilamullu angallannerup akisuallaaleratarsinnaanera minnerunngitsumillu Naalakkersuisut akissuteqaataat innersuussutigalugu suliamut kinguarsaataannaasinnaasutut nalilerneqarmat.
- Inuit Ataqatigiit Tasiilami mittarfiliornissaq pingaartilluinnarparput, isumaqarpugullu sukkanerusumik atuisunullu akisunerulersitsisussaanngitsumik suliaq nammineerluta aallartittariaqaripput, Bendt B. Kristiansen oqarpoq.
Atuaruk: Naalakkersuisut: Tasiilami mittarfiliortoqassaaq