naalakkersuisunngortoq
IA: Taamaammat taaseqataassanngilagut
Siumumeersup Finn Karlsenip Naalakkersuisuni ilaasortatut ivertinneqarneratigut polikkikkut eqqissisoqarnissaa Inuit Ataqatigiit upperinngilaat
Finn Karlsen Siumumeersoq aalisarnermut, piniarnermut nunalerinermullu naalakkersuisutut Inatsisartuni ivertinneqalerpat Inuit Ataqatigiit taaseqataanianngillat. Inuit Ataqatigiit isumaqarput inuup ataatsip taarserneratigut politikkikkut mamianartuliat uninnavianngitsut.
Finn Karlsen Siumumeersoq politikkiunermini aappassaa aalisarnermut, piniarnermut nunalerinermullu naalakkersuisunngussaaq. Siullermik taama inissisimavoq Hans Enoksenip Naalakkersuisuni siulittaasuunerata nalaani. Ilimarpoq ataasinngornermi naalakkersuisutut ivertinneqarnissaa parteeqataa Karl Lyberth atorfimminit januarip arfernat tunuareersoq.
Akisussaaffik qaffasinnerusumiippoq
Siorna qinersinerup kingorna aappassaa Naalakkersuisuni taarsiisoqarpoq illuatungiliuttullu Inuit Ataqatigiit eqqissisoqarnissaa ilimaginngilaat.
- Inuup ataatsip taarsernerinnaatigut Naalakkersuisuni eqqissisoqarnissaa ilimaginngilarput. Qinersinerup kingorna kukkuluttornerit mamianartullu tulleriiaallutik puttallaqattaarput ilimaginngilarpullu inuup ataatsip taarserneratigut tamakku unikkumaartut, Inuit Ataqatigiit siulittaasuat Kuupik Kleist Sermitsiaq.AG-mut oqarpoq.
Inuit Ataqatigiit isumaqarput politikkikkut toqqissisimannginnermut pissutaasoq Naalakkersuisut qullersaanniittoq.
- Naalakkersuisuni eqqissisimannginnermut akisussaaffik Naalakkersuisut siulittaasuanniippoq. Taamaammat Finn Karlsenip ikkunnerinnaatigut toqqissisimasumik aqutsisoqalernissaa ilimaginngilarput, Kuupik Kleist oqarpoq.