IA-mit siunnersuut: Inuit kulturiat pillugu iliniartitsiviusinnaasumik pilersitsisoqarli
Ilinniarfik nutaaq inuusuttut amerlanerusut ilinniagaqalernissaannut pilersitseqataassaaq, taamatut isumaqarpoq Peter Olsen Inuit Ataqatigiinneersoq. Naalakkersuisut inuit kulturiat pillugu ilinniartitsiviusinnaasumik pilersitsoqarnissaa pillugu siunnersuummut tapersiipput.
Inuiaqatigiit nukittunerulersinniarlugit Inuit kulturiat pillugu ilinniartitsiviusinnaasumik pilersitsisoqartariaqarpoq.
Peter Olsen Inuit Ataqatigiinneersoq, assassornikkut atuagarsornikkullu Inuit Kulturitoqqarput pillugu ilinniartitsiviusinnaasumik pilersitsisoqarnissaanik siunnersuuteqarsimasoq taamatut isumaqarpoq.
- Taamaalilluta siulitta qanoq inuuseqarsimanerannut piuseqarsimanerannullu tunngasunik ilisimasaqarnerulissaagut. Pikkorinnerulernerput, ilisimasaqarnerulernerpullu ilutigalugu, inerisimassutsikkut, tarnikkut timikkullu nukittulerulerlutalu peqqinnerulernissarput qularutigingilluinnarpara, siunnersuummini erseqqissaatigaa.
Inuusuttut amerlanerusut ilinniagaqalissasut
Peter Olsenip taamaammat Naalakkersuisunut ilaatigut misissoqquaa, ilinniarfissaq ilinniartoqarfinnut pioreersunut inissinneqarsinnaanersoq.
- Assersuutigalugu periarfissat ilaattut Knud Rasmussenip højskolia siunertarisannut tunngasumik ilinniarfinngortinneqarsinnaanersoq misissugassanut ilaasinnaavoq. Pissutigalugu illoqarfimmi tassani Kalaallisuuliornermik ilinniarfeqareerpoq. Sisimiut aamma qimmeqarfissuullunilu qimussertarfissuuvoq, ilinniarfillu sissamut qanittuunera pissutigalugu, qaanniornermik, qajartornermillu ilinniarfissatut piukkunnartorsuulluni, IA-mi politikkeri oqarpoq.
Naalakkersuisut siunnersuummut tapersiisut
Taanna isumaqarpoq, ilinniarfimmik pilersitsinikkut inuusuttut amerlanerusut ilinniakkaminnik naammassinnittalissasut:
- Misissuinerup ersersissavaa, taamatut ittumik ilinniarfeqalernikkut ilinniarnermik unitsitsiinnartarneq ilinniagaqanngittarnerlu piffissaq ungasinnerusoq eqqarsaatigalugu pinaveersaartinneqarsinnaanersoq.
Naalakkersuisut siunnersuummut tapersiipput, inassutigalugulu siunnersuut akuerineqassasoq.