soraarnerussutisiat

IA: Siumup utoqqaat asuli qineqqusaarutigai

Soraarnerussutisiat pillugit siunnersuut itigartinneqarpoq. IAp Siumut neriorsuutinik tunussinerarpaa

Mimi Karlsenip Siumukkut asuli utoqqarnik qineqqusaaruteqarsimanerarpai

Inatsisartuni amerlanerussuteqartut soraarnerussutisiallit aalajangersimasumik soraarnerussutit saniatigut isertitaqaleraangamik soraarnerussutisianik ilanngaanneqartarunnaarnissaannik siunnersuut itigartippaat. Inuit Ataqatigiit Siumut pisuutippaat utoqqarnik asuli qineqqusaaruteqarsimasutut.

Siumut sinnerlugu Inatsisartunut ilaasortaq Kristian Jeremiassen siunnersuummik saqqummiussaqartuuvoq. Taassuma siunnersuutigaa soraarnerussutisiat pillugit Inatsisartut peqqussutaat allanngortinneqassasoq. Soraarnerussutit ullumikkut ilanngarneqartarput soraarnerussutit saniatigut aalajangersimasumik isertitaqartoqaleraangat. Kristian Jeremiassenip siunnersuutigaa immikkut isertitaqarnermi soraarnerussutisiat ilanngarneqartarunnaassasut. Ilanngullugu siunnersuutigaa angerlarsimaffimmi ikiorteqarnermut utoqqaat akiliuteqartarunnaassasut.

Siunnersuulli Inatsisartuni amerlanerussuteqartunit ilaatigut Siumumit itigartinneqarpoq. Itigartitsineq Inuit Ataqatigiit maanna isornartorsiorpaat.

Oqallisigeqqikkusuppaat
- Siunnersuuteqartoq Kristian Jerimiassen oqaaseqarnermini soorunami pakatsisi-maqaluni oqarpoq: Tassa taakku Siumumi qineqqusaarutigut allassimasut. Kristian Jerimiassen ilumoorpoq. Qineqqusaarutit tununneqarput. Utoqqaat salloqittarneqarput, Inuit Ataqatigiit sinnerlugit Inatsisartuni ilaasortaq Mimi Karlsen tusagassiutinut taama nalunaaruteqarpoq.

Siunnersuut Inuit Ataqatigiit siunnersuut aamma akerleraat isumaqaramik pissaqarnerusut uani salliutinneqartut, taamaattoq siunnersuutip oqallisigeqqinnissaanut piareersimanerarput.

- Utoqqaat ikiorneqarnermikkut akiliisarunnaarnissaat tapersernarpoq. Taannali allanngussagutsigu tamakkiisumik allanngortittariaqarparput, aamma atugarliornerusut ikiorluarneroqqullugit, Mimi Karlsen oqarpoq.

Powered by Labrador CMS