IA SIK-mit isornartorsiorneq akissuteqarfigaa
IA-mit isumarineqarpoq SIK nunatsinni aatsitassarsiortunut aatsitassarsiorniarlutillu misissuisunut sulisoqarnikkut isumaqatigiissuteqanngitsoq. Partiip paaserusuppaa suliassat pillugit SIK isumaqatigiissusiorniarniarnersoq. Taamaattoqarpoq, SIK akivoq.
SIK-p politikerit "issoqannginnerarlugit" - tassa qunutunerarlugit taareeraalu, Inuit Ataqatigiit akissuteqarput.
Siumup Kuannersuit pillugit tusarniaanissamik kinguartitsiniarnermik isumaqalersimanera pillugu SIK isornartorsiuinermini IA aamma taavaa.
IA tusagassiorfinnut nalunaarutimini nassuiaavoq partiip SIK isumaqatigalugu Narsami nunallu sinnerani ataavartunik suliffinnik pilersitsinissamut soqutigisaqarluni.
- Paasiuminaalluinnartorli tassaavoq Narsami aatsitassarsiorfiliorniarnermut pilersaarut pillugu tusarniaanerit kinguartinneqarnissaannik partii Siumup kissaateqarneranut Inuit. Ataqatigiit akulerunneqarmata, Inuit Ataqatigiit Inatsisartunut ilaasortaat ataatsimoorlutik nalunaaruteqarlutik allapput.
Isumaqatigiissutit naak
IA akissutimini erseqqissaavoq ilisimasaqarani sulisartutut inuussutissarsiuteqartut kattuffiat aatsitassarsiortunut aatsitassarsiulersinnaasunullu sulisoqarnikkut isumaqatigiissuteqarsimaneranik, taamaattumillu paasiumallugu SIK taama ittunik isumaqatigiissuteqarniarnersoq.
Taamaattoqarpoq, Jess G. Berthelsen ilisimatitsivoq.
- Isumaqatigiissuteqareerpugut sulilernissamut oqaatsit aporfiussanngitsut. Soorlu kalaallisuinnaq oqaluttuugaanni, imaluunniit tuluttuinnaq oqaluttuugaanni, sulilernissamut oqaatsit killilersuissanngillat, SIK-mi siulittaasoq oqarpoq.
Ajornerulersitsissanngilaq
SIK-mi siulittaasoq Sermitsiaq.AG-mut erseqqissaavoq sulisartut inuussutissarsiuteqartut kattuffiata ilaasortani ulorianartumut suliartortinnavianngikkai.
- Sillimanianikkut isumannaallisaanikkullu pisariaqartut inissinneqaqqaassapput, ilaasortagut taqqavunga suliartortinnagit, Sermitsiaq.AG-mut oqaluttuarpoq.
- Ilaasortatsinnut sulinermi atugassarisatigut ajornerulersitsinissamik eqqarsaateqanngilluinnarpugut, Jess G. Berthelsen naggasiivoq.
SIK-mi siulittaasoq ilanngullugu erseqqissaavoq SIK-p aamma Greenland Rubyp akornanni isumaqatigiissut inaarneqangajalersoq. Tassani apeqqutaaginnalerpoq sulisut ilinniarsimanngitsunut tunngatillugu isumaqatigiissutissap inissinnissaa, oqarpoq.