kommunimut qineqqusaarneq
'IA Sermersuumi pissaanermik annaasaqarnissaminut ernumasoq'
Martha Lund Olsen, Nick Nielsenimit (IA) isornartorsiorneqareerluni IA-kkormiut akissuteqarfigai. Partiip Sermersuumi pissaanermik annaasaqarnissaminnut ernumanerarpai
IA-p kommunalbestyrelsimut qinigassanngotitaata, Nick Nielsenip, Kommuneqarfik Sermersuumi qineqqusaaqatini Naalakkersuisuusimasoq, Martha Lund Olseni (S), isornartorsioraa tallimanngormat Sermitsiaq aviisimi saqqummertumi atuarneqarsinnaavoq.
Kommuneqarfik Sermersuup inuttut atugarliuteqartunik annikippallaamik suliniuteqarnerarlugu Martha Lund Olsenip (S) Nuuk TV-kkut isornartorsiuvisimavoq.
Atuaruk: Martha partiimut nukittorsaataassaaq
'Imminuinnaq sullippoq'
Martha Lund Olsen 'imminuinnaq sullippoq' , Nick Nielsen Sermitsiamut allappoq.
- Nunatsinni inunnik isumaginninnikkut pissutsit suliarineqarnerinut Martha Lund Olsen (S) qaffasinnerpaamik akisussaasuusimavoq, atugarliortunulli iluaqutaasussanik suliniuteqarnissaraluaminut taarsiullugu, sulinini ima ilusilersimavaa, Nunatta Isumaginninnikkut Killiffianik atorfilittani nalunaarusiortissimallugit – piffissalernera ima inissillugu, kommuninut qineqqusaarnerup nalaani isornartorsiutinik Sermersooq uparuarneqarsinnaasunngorlugu, Nick Nielsen ilaatigut taama allappoq.
Martha Lund Olsenip naalakkersuisutut piffissani atorsimavaa borgmesterinngorniarnissaminut piareersarfimmisut, Nick Nielsen taama isumaqarpoq.
Atuaruk: Martha: "Taamaammat kommunalpolitikkimut nuulerpunga"
Isumalersuillutik takorluukkersaalertarnerat
Nick Nielsenip isornartorsiuvinera maanna Martha Lund Olsenimit akissuteqarfigineqarpoq.
- Ilisimanngisanut siooraneq annaasaqarnissamulli siooranerup inuk eqqumiitsumik pissusilersortilersarpaa – immaqa Nick Nielseni (IA) taama oqaatigineqarsinnaavoq, Martha Lund Olsen oqarpoq.
Taamaammat Nick Nielsenip isorinninnera 'piviusuunngitsunik isumalersuilluni takorluuinerarpaa'.
- Ilisimaneqarpoq inuit qunigisaqaraangamik merserisaqaraangamilluunniit piviusuunngitsunik isumalersuillutik takorluukkersaalertarnerat. Nick Nielsenip uannut pasilliutigileriallaraa qangarsuarligooq pilersaarusioreersimasunga borgmesterinngorniarnialunga, Martha Lund Olsen oqarpoq.
Atuaruk: Kim Kielsen tusagassiortunik aggersaavoq
Pissaanermik annaasaqarnissamik ernumasut
IA-kkut Kommuneqarfik Sermersuumi pissaanermik annaasaqarnissaminnut ernumalersimallutik qisuariarnerarpai.
- Tupinnalaanngitsuunngilaq ernumaneq ima angitigisimarpasimmat allaat tamakkiunneqartutut malersorneqartutullu IA-kkormiut misigisimalersimarpasillutik – IA-kkormiut akornanni mamarliinerit tamatumunnga pissutaasimassapput.
- Aamma innuttaasunit eqqumiigineqassaqqooqaaq, pisortamik borgmesteri Asii Chemnitz Narup-ip oqallinnerni torersumik pissusilersornissamik pingaartitsineraalluni oqalunnerata nalaani. Tamanna allatut oqaatigineqarsinnaanngilaq: marloqiusamik pissusilersorluni pisuusaarneq, Martha Lund Olsen oqarpoq.