Ikuiniarneq
IA Røde Korsimut 500.000 koruuninik tapiissuteqarnissamik siunnersuuteqartoq
- Kalaallit Nunaata kissalaarnermik inuppalaarnermillu avammut takutitsisinnaanera inuiaqatigiittut ataatsimut suliassatsitut isigaarput, partiip siulittaasua Sara Olsvig erseqqissaavoq
Nunarsuarmioqatigiit qimaasunit perulunnermik eqqugaavugut. Inuit ajornartorsiornerat iliuuseqarfigineqartariaqarpoq. Taamaattumik Inuit Ataqatigiit siunnersuutigaat Nunarput million koruunit affaannik Røde Korsimut qimaasunut ikiuinissamut tapiissuteqassasoq.
- Inuit Ataqatigiinnut tamanna tunngaviulluinnarpoq. Inuiaqatigiittut ataatsimoorluta suliassatsitut isigaarput ikiuisinnaanermik meeqqatsinnut takutitsineq. Inuiaqatigiittut ataatsimoorluta suliassatsitut isigaarput misiginneqatiginninnermik, kissalaarnermik inuppalaarnermillu avammut takutitsisinnaaneq, partiip siulittaasua Sara Olsvig tusagassiorfinnut nalunaarummi erseqqissaavoq.
Nammineq ajornartorsiutit
Taamatut oqariartuuteqartoqarpoq partiip Kalaallit Nunaata qimaasunik amerlanngikkaluartunilluunniit tigusisinnaaneranik siunnersuutaa tusaaniarneqanngereersorlu.
Isornartorsiuisut ilagaat Atassummi politikeri Steen Lynge, qimaasunik tigusisinnaaneq eqqartorneqalersinnagu Kalaallit Nunaata ajornartorsiutinik soorlu inissaaleqinermik tarnillu pissusaanik immikkut ilisimasalinnit ikiorsiisinnaanerup amigaataaneranik aaqqeeqqaartariaqarneranik tikkuussisoq.
Qanorluunniit pisoqaraluarpat ikiuussinnaaneq
Sara Olsvig tamatuma akerlianik pissutsit akuleriissinneqarnissaannut mianersoqqussuteqarpoq.
- Aamma ilisimalluinnarparput Nunatsinni inuuniarnikkut isumaginninnikkullu annertuunik suliassaqartugut. Isumaqarpugulli Nunatsinni atugarliorneq pillugu eqqartuineq qimaasut pillugit oqallinnermut akuleruttussaanngikkaluartoq. Nunatsinni innuttaqativut inuttut inuuniarnermikkullu atugarliortut pillugit ullut tamaasa suliniuteqarpugut inoqatinulli misiginneqatiginnissinnaanermut aamma ilaavoq nammineq ajornartorsiutigisat iliuuseqarfiginiarnerisa saniatigut allanut aamma iliuuseqarsinnaaneq, erseqqissaavoq.
IA siunnersuutiminik Naalakkersuisunut Inatsisartunilu Aningaasaqarnermut Ataatsimiititaliamut ingerlatitseqqippoq.
Aamma atuakkit: Namminersortut qimaasunik tikilluaqqusissapput
Steen Lynge: Qimaasut Kalaallit Nunaannit akissaqarfigineqanngillat