akitsuutit

IA: Randi taamaammat uppiseriaraluarparput

Aningaasaqarnermut naalakkersuisoq, Randi Vestergaard Evaldsen (D) 'eqqunngitsumik aamma tatiginanngitsumik' akitsuutinut nutaanut tunngatillugu saqqummertoq, partii illuatungiliuttoq isumaqarpoq

- Inatsisartunik eqqunngitsumik paatsoorneqarsinnaasunillu suliap ingerlanerani paasissutissiisaqattaartoqarpoq, naalakkersuisunullu pineqartunut akisussaaffigineqartariaqarluni. Akisussaaffik atorfilittanut milorujutiinnarneqarsinnaanngilaq, Aqqaluaq B. Egede (qaqortumik tujuuluaralik) tusagassiuutinut nalunaarummi naqissusiivoq.

Aningaasaqarnermut naalakkersuisoq, Randi Vestergaard Evaldsen (D), akitsuutinut nutaanut ilaatigut mamakujuttunut tunngasumi 'eqqunngitsumik aamma tatiginanngitsumik' suliaqarpoq.

Naalakkersuisunut ilaasortap ataasinngornermi tunuarteriaraluarneranut Inuit Ataqatigiit tunngavilersuutaat taama nipeqarpoq.

Atuaruk: Randi Vestergaard Evaldsenimut tatiginnikkunnaarnermik taasititsinermut amerlanerussuteqanngitsut

Amerlanerussuteqanngitsut
Tatiginnikkunnaarnermik siunnersuummut Partii Naleraq ilannguppoq, tassanili amerlanerussuteqalersitsisinnaasimanngillat, partiit naalakkersuisooqatigiit Siumut, Demokraatit aamma Atassut Naalakkersuisunut ilaasortamut tapersiimmata.

Naalakkersuisut suliamik tunuartitsipput, akitsuutillu kingumoortumik akiliutigisassanngorlugit eqqunneqartut utertinneqarnissaat kissaatigalugit, tamannalu Inatsisartut upernaakkut ataatsimiinnerminni taperserpaat.

Utertitsisariaqartut
Naalakkersuisut akiliutigineqartut utertinnissaat kissaatigaat, inatsisip kingunissaanut naliliinermi Naalakkersuisut paasissutissat atugaat kukkuneqartut paasinarsimmat.

Akitsuutit nutaat atorfilittat naliliinerannit siullermit annertunerusumik eqquipput. Tamannalu tunngavigalugu akitsuutinik kingumoortumik akiliisut tamarmik aningaasaatitik tigoqqissagaat tulluartuusoq Naalakkersuisut isumaqarput.

Paasissutissat eqqunngitsut
Inuit Ataqatigiit politikkikkut oqaaseqartartuata, Aqqaluaq B. Egedep, Randi Vestergaard Evaldsenip uppiseriaraluarnera arlalinnik pissuteqartoq tikkuarpaa.

- Inatsisartunik eqqunngitsumik paatsoorneqarsinnaasunillu suliap ingerlanerani paasissutissiisaqattaartoqarpoq, naalakkersuisunullu pineqartunut akisussaaffigineqartariaqarluni. Akisussaaffik atorfilittanut milorujutiinnarneqarsinnaanngilaq, Aqqaluaq B. Egede tusagassiuutinut nalunaarummi naqissusiivoq.

Naalakkersuisut akitsuusersuinermut tunngatillugu kingunissat eqqarsaatigilluarsimanngikkaat, pisiniarfiutilinnullu akorngutaasimasut, taanna isumaqarpoq.

Atuaruk: Akitsuutinit 8 millionit koruunit pisiniarfinnut utertinneqassapput

Powered by Labrador CMS