paarlaannerit

IA: Qinigaaffiup sinnera patajaatsumik aqutsisoqartariaqarpoq

Qinigaaffiup sinnerani patajaatsumik aqutsisoqartariaqartoq, IA politikkikkut oqaaseqartartua, Bendt B. Kristiansen, Kim Kielsenimut piumasaqarpoq

Qinigaaffiup sinnerani patajaatsumik aqutsisoqartariaqartoq, Naalakkersuisooqataasut, Inuit Ataqatigiit piumasaraa.

Naalakkersuisunik nikisitsisaqattaarneq pillugu, partiip politikkikkut oqaaseqartartua, Bendt B. Kristiansen, tusagassiuutinut nalunaaruteqarluni isortarnartorsiuivoq.

- Aaqqissuusseqqinnerit pingaarutillit iluatsissappata naalakkersuinikkut suliat massakkut aallaaviusariaqarput salliunneqarlutillu. Nikerartoqartillugulu ikerinnakkullu qinersisoqartillugu suliat kinguaattoorsinnaasarlutik., taanna allappoq.

Naalakkersuisut siulittaasuannut, Kim Kielsenimut (S) toqqaannartumik allagaqarluni toqqisisimalernissamik taanna piumasaqarpoq.

- Inuit Ataqatigiit maanna piumasaraarput Naalakkersuisut siulittaasuat patajaatsumik ingerlatseqqullugu. Inuiaqatigiit kissaataat ersarippoq nunarput toqqissisimanartumik aqunneqartariaqartoq, Bendt B. Kristiansen paatsoorneqarsinnaanngitsumik nalunaaruteqarluni oqarpoq.

Atuaruk: Inuusuttup namminiilivinnissamik anguniagaqartup Kim Kielsen unammillerpaa

Taanna nangilluni allappoq, Naalakkersuisuutitatsinnut piumasaqaatigiuarput patajaatsumik ingerlatsinissaq, nuannaarutigivarpullu tamanna eqquutsimmassuk.

- Taannalu tunngavigalugu Naalakkersuisut kikkulluunniit ingerlatsisariaqarput. Siumullu iluani aaqqiagiinnginneq pillugu, Bendt B. Kristiansen allappoq:

- Partiit allat iluminni qanoq aaqqiagiinngissuteqaraluarunilluunniit pingaartittariaqarpaat inuiaqatigiit toqqissisimanartumik sullissallugit.

Powered by Labrador CMS