IA qinersisoqarnissaanik anguniagaqarniartoq
Partii Naleqqamut sanilliulluni IA qinersisoqarnissaa anguniarlugu iliuuseqarniarpoq. "silaannaq salinneqarniassammat", IA-mi siulittaasoq oqarpoq.
Partiimi IA-mi siulittaasup Múte B. Egedep Sermitsiaq.AG-mut uppernarsarpaa, partii "qinersinissamik nalunaaruteqartoqarnissaa anguniarlugu iliuuseqarnissamut piareeqqasoq”.
- A-mik oqarsimagaanni, taava aamma B-mik oqartoqartariaqarpoq, tassa oqaaserisimasat malitseartinneqartariaqarput, IA-mi siulittaasoq oqarpoq.
Partii ikinnerussuteqarlutik naalakkersuisooqatigiinnut tatiginnikkunnaarluni taasitsisoqarnissaanut tunngaviliisinnaasumik oqaluserisassamik ilanngussiniarnersoq pillugu Múte B. Egede toqqaannartumik aperineqarami imatut oqarpoq:
Amerlanerussuteqarnissaq pisariaqartoq
- Tatiginnikkunnaarnermik taasititsineq aatsaat atorneqarsinnaavoq amerlanerusut tapersiippata. Inatsisartuni amerlanerussuteqartut silaannaap salinneqarnissaanik kissaateqarlutik oqaaserisimasaat eqqarsaatigaarput, Ilisimatusarfiup isumasiueqqammernerani qinersisoqartuuppat Siumumit partiip annerulernissaanik siulittuisoqarsimanera naapertorlugu nunami partiit illuatungiliuttut annersaanni siulittaasoq oqarpoq.
Aamma atuaruk: Qinersisartunik isumasiuineq: IA ajugaarujussuassaaq
Pele Brobergip oqaatiginikuuaa, Partii Naleraq tatiginnikkunnaanermik taasitsinianngitsoq, tassa inupalaatut Siumup qineqqusaarnermi, kommunimut qinersisoqangajalernera ilutigalugu coronap atuunnerata nalaani pisinnaasup, atorsinnaasaanik isigineqarusunnginnamik. Partii Naleqqamit aamma Demokraatit pisariaqalernerani iliuuseqarsinnaanerat nalornissutiginearpoq.
Utaqqimaartoqartoq
- Aap, utaqqimaartoqarpoq, naatsorsuutigilluinnarparali IA qinersisoqarnissaata nalunaarutigineqarnissaa anguniarlugu oqaluuserisassanngortitsissasoq, amerlanerussuteqartummi tamanna kissaatigaat, Jens-Frederik Nielsen oqarpoq.
- Tamannali Ukiuunerani ataatsimiinnerup ulluani siullermi aappaaniluunniit pissanersoq naluara, taanna oqarpoq.